ہیپاٹائٹس کلینک میں جدید ترین طبی سہولتیں دیکھ کر بہت خوشی ہوئی ہے:شہبازشریف

 وزیراعلیٰ کلینک میں بنائے ہر سیکشن میں گئے اور وہاں موجود ڈاکٹروں اور دیگر عملے کے ساتھ بات چیت کی۔ وزیراعلیٰ نے مریضوں کی آمد سے لے کر ان کے میڈیکل چیک اپ کے پورے نظام کا معائنہ کیا ۔ وزیراعلیٰ نے ہیپاٹائٹس کلینک میں جدید ترین مشینری اور آلات لگانے پر متعلقہ حکام کی کارکردگی کو سراہا اور اس کلینک کو ہیپاٹائٹس کے امراض میں مبتلا مریضوں کے علاج کیلئے شاندار کاوش قرار دیا۔ وزیراعلیٰ نے ڈاکٹروں اور دیگر عملے سے گفتگو کرتے ہوئے کہا کہ جس شاندار انداز میں عمارت کا ڈیزائن بنایا گیا ہے، اس سے شاندار طبی سہولتوں کی فراہمی کا انتظام کیا گیا ہے۔ بلاشبہ یہ صحت عامہ کے شعبہ میں ایک سنگ میل ہے۔ وزیراعلیٰ نے کہا کہ دکھی انسانیت کے زخموں پر مرہم رکھنا بہت بڑی عبادت ہے اور مریض کا آدھا درد اس وقت دور ہو جاتا ہے جب ڈاکٹر اس سے اچھے طریقے سے پیش آتا ہے۔ وزیراعلیٰ نے ہیپاٹائٹس کلینک میں اعلیٰ معیار کے تعمیراتی کام کو بھی سراہا اور متعلقہ حکام کو شاباش دی۔ وزیراعلیٰ نے کہا کہ ہیپاٹائٹس کلینک میں مہیا کی جانے والی جدید ترین طبی سہولتیں دیکھ کر میرا دل باغ باغ ہو گیا ہے۔