شہر کراچی میں سال کی پہلی بوندا باندی سے موسم مزید سرد ہوگیا ہے۔ آج صبح کراچی کے مختلف علاقوں میں بوندا باندی سے موسم خوشگوار ہونے کے ساتھ ٹھنڈ میں بھی اضافہ ہو گیا ہے۔جن علاقوں میں بوندا باندی ہوئی ہے ان میں سائٹ، بلدیہ، صدر، ہاکس بے، اورنگی ٹاؤن، ایف بی ایریا اور نارتھ کراچی شامل ہیں۔
کراچی میں محکمہ موسمیات نے پیشن گوئی کی ہے کہ آج موسم سرد اور ابر آلود رہے گا، دوسری جانب آج کم سے کم درجہ حرارت 9.5 ڈگری سینٹی گریڈ ریکارڈ کیا گیا، موجودہ درجہ حرارت 14 ڈگری سینٹی گریڈ ہے۔ محکمہ موسمیات نے کراچی میں ٣ جنوری کو بارش کی پیش گوئی کی ہے جس کے باعث شہر کراچی کا موسم مزید سرد ہو جائے گا۔
ادھر کوئٹہ شہر اور گرد و نواح میں موسم سرما کی پہلی برف باری شروع ہو گئی ہے، صبح سے ہی ہلکی برف باری کا سلسلہ وقفے وقفے سے جاری ہے۔