گزشتہ ہفتہ سوشل میڈیا پلیٹ فارمز پر خبروں کی زینت بننے والا محنت کش شربت فروش نوجوان اور ایئرو ناٹیکل انجینئر عبدالمالک اداکار فیروز خان کے ساتھ تصویر میں دکھائی دیے۔
اداکار فیروز خان نے جب اس نوجوان کے بارے میں سنا تھا تو انہوں نے انسٹاگرام پر ایک پوسٹ شئیر کی تھی جس میں انہوں نے ایئرو ناٹیکل انجینئر عبدالمالک سے ملنے کی خواہش کا اظہار کیا تھا۔
اب سوشل میڈیا ویب سائٹ انسٹاگرام پر اداکار فیروز خان نے نوجوان کے ساتھ تصویر شئیر کی جس میں دیکھا گیا ملاقات کے وقت وہ دونوں مسکراتے ہوئے سیلفی لے رہے ہیں۔ شئیر کردہ پوسٹ کے کیپشن میں فیروز خان نے لکھا کہ دلکش شخصیت اور روشن امید والی مسکراہٹ کے ساتھ کیا ہمت والا لڑکا ہے؟
فیروز نے مزید لکھا کہ مجھے ایسے لوگوں سے بے حد محبت ہے، میر ی تمام تر نیک خواہشات آپ سب محنت کرنے والوں کے ساتھ ہیں۔
انہوں نے مشکل حالات کا سامنا کرنے والوں افراد کی حوصلہ افزائی کرتے ہوئے لکھا کہ روشنی، جیت اور خواب یہ سب آپ کے منتظر ہیں، جائیں اِنہیں حاصل کریں!‘
خیال رہے کہ ایئرو ناٹیکل انجینئر عبدالمالک کی داستان نے سب کو افسردہ کر دیا تھا لیکن ان کی ہمت اور کبھی ہار نہ ماننے کی جستجو نے دیکھنے والوں کے حوصلے بلند کر دیئے تھے۔