پاکستان کرکٹ ٹیم کے نوجوان فاسٹ باؤلر شاہنواز دھانی نے پاکستان کرکٹ بورڈ کی طرف سے باز پرسی کے فیصلے کے بعد سوشل میڈیا اکاؤنٹ سے پیغامات ڈیلیٹ کردیے ہیں۔
پیسر نے ایشیا کپ اور افغانستان سیریز میں سلیکٹ نہ ہونے پر صحافیوں اور پی سی بی کو تنقید کا نشانہ بنایا تھا۔
ٹویٹر پر اپنے پیغام میں شاہنواز دھانی کا کہنا تھا کہ کسی صحافی نے میرے اعداد و شمار سلیکٹرز کو نہیں دکھائے، "کیا دھانی پاکستانی پیسر نہیں؟"
شاہنواز دھانی کی جانب سے جاری کردہ بیان پر پی سی بی مینجمنٹ نے شدید ناراضگی کا اظہار کرتے ہوئے شاہنواز دھانی کے بیان پر ایکشن لینے کا فیصلہ کیا تھا۔
پی سی بی ذرائع کا کہنا تھا کہ کسی کھلاڑی کو اختیار حاصل نہیں کہ وہ صحافیوں اور سلیکشن کمیٹی پر بلاوجہ تنقید کرے، لیگل ڈیپارٹمنٹ کل فاسٹ باؤلر کے بیان پر بحث کرے گا۔
پاکستان کرکٹ بورڈ کی طرف سے کارروائی کے فیصلے کے بعد فاسٹ باؤلر نے سوشل میڈیا سے متنازعہ ٹویٹ ڈیلیٹ کردیے ہیں۔
یاد رہے کہ پی سی بی نے ایشیا کپ اور افغانستان کیخلاف سیریز میں شاہنواز دھانی کو شامل نہیں کیا تھا جس پر فاسٹ باؤلر ناراض ہیں۔