پاکستان میں غربت، مہنگائی، بیروزگاری کی وجہ سے مستقبل کے خدشات سے دوچار شہریوں کے بیرون ملک جانے کا سلسلہ تیز ہوگیا ہے، گزشتہ ڈیڑھ سالوں میں لاکھوں افراد ملک سے باہر جاچکے ہیں تاہم لاکھوں ایسے ہیں جو بار بار درخواست کے باوجود ویزا حاصل کرنے میں ناکام رہتے ہیں۔
لوگ ویزا کے لئے درخواست دیتے ہیں مگر ان کی درخواست کسی نہ کسی وجہ سے مسترد ہوجاتی ہے، ویزا مسترد ہونے کی کوئی ایک وجہ نہیں بلکہ کئی وجوہات ہوسکتی ہیں، جن پر غور کریں تو ناکامی کے امکانات کو کم کیا جاسکتا ہے۔
ماہرین کہتے ہیں کہ ویزا درخواست مسترد ہونے کی ایک وجہ نامکمل یا غلط معلومات ہوتی ہیں جبکہ دستخط، نامکمل فارم، غلط پاسپورٹ نمبر اور دیگر غلطیاں بھی آپ کی درخواست مسترد ہونے کی وجہ بنتی ہیں۔
ویزا کیلئے جب بھی درخواست دیں تو اس بات کو یقینی بنائیں کہ آپ کی تمام معلومات درست اور اس میں کوئی غلطی نہیں ہے، کوشش کریں کہ کسی ایکسپرٹ سے فارم پر کروائیں تاکہ کسی تکنیکی غلطی کی گنجائش بھی باقی نہ رہے۔
کسی بھی طرح کے جرم اور مجرمانہ ریکارڈ کی وجہ سے آپ کی درخواست مسترد ہوسکتی ہے۔ اگر ماضی میں آپ کا کوئی بھی ایسا ریکارڈ رہا ہے تو اس کی تفصیل سے وضاحت کریں تاکہ آپ کو ماضی کے کسی جرم کی وجہ سے مشکل کا سامنا نہ کرنا پڑے۔
ویزا کی درخواست پر کام کرنے والے متعلقہ افسران آپ کے اپنے ملک سے تعلقات اور جذبات کو بھی باریکی سے پرکھتے ہیں، آپ واپس آئینگے یا نہیں اس بات کا دار و مدار آپ کے اپنے وطن سے اچھے تعلقات اور جذبات پر بھی منحصر ہوتاہے۔
اپنی درخواست جمع کروانے سے پہلے اس بات کو یقینی بنائیں کہ آپ کی تمام سفری دستاویزات درست اور تازہ ترین ہوں۔ آپ کے پاس اچھی رقم ہونا بھی بہت اہمیت کا حامل ہے ویزے کی درخواست کے ساتھ متعلقہ ملک سے آیا دعوت نامہ یا جہاں سے کام کی پیشکش ہو اس کا لیٹر ضرور لگائیں۔
اگر آپ اس سے پہلے کسی ملک میں مقررہ مدت سے زیادہ قیام کرچکے ہیں تو آپ کی درخواست مسترد ہوسکتی ہے، اس لئے کوشش کریں کہ کبھی بھی کسی ملک جائیں تو وہاں کا ویزا ختم ہونے سے پہلے واپس آئیں تاکہ آپ کا ریکارڈ اچھا ہو۔
ان تمام باتوں پر عمل کرنے کے بعد آپ کے ویزا کی درخواست منظور ہونے کے امکانات بہت زیادہ بڑھ سکتے ہیں۔