معروف ٹی وی میزبان اور چیئرمین پی ٹی آئی کی سابقہ اہلیہ ریحام خان کے شوہر مرزا بلال نے انکشاف کیا ہے کہ ریحام سے پہلے بھی اُن کی دو شادیاں ہوچکی ہیں۔
ریحام خان اورمرزا بلال نے ایک ساتھ انٹرویو میں اپنی اپنی زندگیوں سے متعلق نئے انکشافات کیے۔
ریحام خان نے بتایا کہ وہ کراچی اس لیے منتقل ہوئی ہیں کیونکہ وہ کسی سیاسی جماعت میں شمولیت کا ارادہ رکھتی ہیں۔انہوں نے کہا کہ سماجی کام کرنے سے سارے مسائل حل نہیں ہو سکتے، جو ہو چکا سو ہو چکا، وہ پاکستان کو نئی سمت میں لے جانے کے لیے کسی بھی سیاسی جماعت میں حصہ لیں گی۔
ریحام خان کا مزید کہنا تھا کہ پاکستان کی بہبود کے لیے کام کرنا چاہتی ہیں اور اس کے لیے پارلیمنٹ کا رستہ ہی صحیح سمت ہے۔
ریحام خان نے کہا کہ میں نے کبھی نہیں سوچا تھا کہ پختون ہوتے ہوئے اردو اسپیکنگ شخص سے شادی کریں گی، اس پر اُن کے شوہر مرزا بلال کا کہنا تھا کہ انہوں نے بھی کبھی نہیں سوچا تھا کہ وہ کسی پختون خاتون سے شادی کریں گے۔
میزبان کے سوال پر ریحام خان کے شوہر مرزا بلال نے بتایا کہ ریحام خان سے قبل بھی اُن کی دو شادیاں ہو ئیں لیکن دونوں شادیاں ٹوٹ چکی ہیں، دونوں سے اُن کی طلاق ہو چکی ہے۔
ریحام خان نے کہا کہ شادی سے قبل مرزا بلال کی طلاقوں کے کاغذات خود دیکھے تھے کیونکہ میں نے زندگی میں بھی مشکلات دیکھیں ہیں اس لئے پوری تسلی کرنے کے بعد مرزا بلال سے شادی کی۔