پاکستان کرکٹ ٹیم کے سابق کپتان ہیروز جیسے خوبصورت اور بااعتماد شاہد آفریدی نے بالی ووڈ فلموں میں کام کرنے کے حوالے سے ملنے والی آفرز کا راز میڈیا کے سامنے مداحوں کو بتادیا ہے۔
نجی ٹی وی سے بات چیت کے دوران سپر اسٹار شاہد آفریدی نے کہا کہ مجھے 2 سے 3 مرتبہ فلمز میں کام کرنے کے حوالے سے پیشکش ہوئی ہے جس میں بالی وڈ موویز بھی شامل ہیں لیکن میں نے انکار کردیا۔
شاہد آفریدی نے فلموں میں کام سے انکار کی وجہ بتاتے ہوئے کہا کہ میری شناخت کرکٹ سے ہے اورمجھے لگتا ہے کہ انسان کو وہی کرنا چاہیے جو وہ کرسکتا ہے۔
ان کا کہنا تھا کہ میں نے فلموں میں کام نہیں کیا نہ ہی میری فیملی سے کبھی کسی نے کام کیا لہٰذا میں نے اس حوالے سے اب تک نہیں سوچا، میں نے کچھ کمرشل کیلئے کام کیے ہیں لیکن اس فیلڈ کیلئے اس سے زیادہ کام نہیں کیا۔
یاد رہے کہ شاہد آفریدی کا شمار پاکستان کے سب سے کامیاب اور سب سے زیادہ شہرت پانے والے کھلاڑیوں میں ہوتا ہے، پاکستان میں شاہد آفریدی کو جو شہرت ملی وہ کسی دوسرے کھلاڑی کے حصے میں نہیں آئی۔