پاکستان شوبز انڈسٹری کے معروف اداکار اور میزبان یاسر حسین نے بدتمیز، مغرور اور غصہ والا ہونے کے حوالے سے لوگوں کی تنقید کا جواب دیتے ہوئے اپنی شخصیت کے اہم پہلوئوں سے پردہ اٹھادیا ہے۔
نجی ٹی وی کے شو میں اداکار یاسر حسین نے ایک سوال کے جواب میں بتایا کہ لوگ مجھے بدتمیز اور مغرور سمجھتے ہیں لیکن میں ایسا نہیں ہوں، ’میں ایک نارمل انسان ہوں لیکن آج کے دور میں نارمل اور سادہ ہونا بھی بہت ابنارمل سا ہے۔
یاسر حسین نے کہا کہ جو لوگ سمجھتے ہیں کہ میں مغرور ہوں، غصے والا، بدتمیز ہوں ، ان کو بتادوں کہ میں غصے والا یا مغرور نہیں ہوں، میں بدتمیز بھی نہیں ہوں۔
انہوں نے کہا کہ ’میں کہتاہوں کہ میرے دل میں جو ہو میں کیوں نہ بولوں؟ لوگ اگرچہ جو دل میں ہو نہیں بولتے، ڈپلومیسی سے کام لیتے ہیں لیکن مجھ سے ایسا رویہ نہیں اپنایا جاتا کیونکہ یہ میرا کام نہیں ہے‘۔
یاد رہے کہ سوشل میڈیا پر اکثر اہم معاملات پر مختلف رائے کی وجہ سے یاسر حسین کو تنقید کا سامنا کرنا پڑتا ہے، سیدھی بات کرنے کی وجہ سے کئی بار لوگ انہیں مغرور یا بدتمیز بھی سمجھتے ہیں تاہم اداکار نے اپنے رویئے کی وضاحت کردی ہے۔