بھارت میں جاری کرکٹ ورلڈکپ میں پاکستان کرکٹ ٹیم کی ناقص کارکردگی کی وجہ سے میڈیا پر جھگڑوں کے حوالے سے سامنے آنے والی اطلاعات کے حوالے سے چیئرمین مینجمنٹ کمیٹی ذکا اشرف نے وضاحت پیش کردی ہے۔
بہاولپور میں میڈیا سے گفتگو کرتے ہوئے ذکا اشرف نے بتایا کہ ٹیم متحد ہے کوئی لڑائی نہیں ہوئی، کرکٹ دشمن فضول کہانیاں اڑا رہے ہیں، ٹیم متحد ہے اور کھلاڑیوں میں کوئی اختلاف نہیں، دعا ہے کہ ٹیم کامیاب ہو، ورلڈکپ میں کارکردگی کے حوالے سے ٹیم اور قیادت میں تبدیلی کا فیصلہ ٹیکنیکل کمیٹی کرے گی۔
ہمارے اوپنر نےکمال کی کارکردگی دکھائی ہے، ہمارے کرکٹرز کو بہت کم پیسے ملتے ہیں، میں نے انضمام الحق کو بلایا لیکن انہوں نے آنے سے پہلے ہی استعفیٰ دے دیا۔
یاد رہے کہ ورلڈکپ میں قومی ٹیم کی اہم میچز میں شکستوں کے بعد پاکستان ٹیم میں گروپ بندیوں اور لڑائی جھگڑوں کے حوالے سے اطلاعات بھی سامنے آئی تھیں تاہم چیئرمین ذکا اشرف نے ٹیم اور مینجمنٹ میں اختلافات کی سختی سے تردید کردی ہے۔
واضح رہے کہ ورلڈکپ کیلئے بھارت میں موجود قومی ٹیم کے سینٹرل کنٹریکٹ کے حوالے سے بھی تنازعات سامنے آئے تھے۔