بھارتی کرکٹ ٹیم کے اسٹار بلے باز ویرات کوہلی کو ورلڈکپ کے اہم میچ میں جنوبی افریقہ کیخلاف سنچری بنانے کے بعد سستی سی پرواز میں سفر کرتے ہوئے مسافروں نے گھیر لیا۔
ایک روزہ کرکٹ میں سب سے زیادہ سنچریاں بنانے کے سچن ٹنڈولکر کے عالمی ریکارڈ کی برابری کے بعد بھارتی ٹیم کے سابق کپتان ویرات کوہلی ایک عام سی پرواز میں سفر کررہے تھے۔
پیر کو کوہلی کو ڈومیسٹک فلائٹ میں سوار ہوتے ہوئے دیکھا گیا اور ان کی موجودگی نے ساتھی مسافروں کو ایک پُرجوش جنون میں مبتلاکردیا۔سابق بھارتی کپتان کے پاس بیٹھے مسافروں نے ماسک کے باوجود کوہلی کو پہچان لیا اور پرواز کے اندر تصاویر اور ویڈیوز لینا شروع کردیں۔
ویرات کوہلی کو دور حاضر کے بہترین بلے بازوں میں سے ایک سمجھا جاتا ہے ،2013ء اور 2022ء کے درمیان انہوں نے تینوں طرز میں 213 میچوں میں بھارتی کرکٹ ٹیم کی قیادت کی۔
کوہلی کے پاس تیز ترین 23000 بین الاقوامی رنز بنانے کا عالمی ریکارڈ بھی ہے۔ کوہلی کئی ایوارڈز حاصل کرچکے ہیں اور حال ہی میں انہوں نے سچن ٹنڈولکر کا ایک روزہ میچوں میں 49 سنچریوں کا ریکارڈ برابر کیا ہے اور یوں محسوس ہوتا ہے کہ وہ جلد مزید سنچریاں اسکور کرکے ٹنڈولکر سے بھی آگے نکل جائینگے۔