اداکارہ ماہرہ خان نے پاکستان میں طویل عرصے سے قیام پذیر غیر قانونی افغان پناہ گزینوں کی ملک سے بے دخلی پر قوم سے اپیل کی ہے کہ وہ افغان بھائیوں اور بہنوں کی مدد اور حمایت جاری رکھیں۔
2019 اقوام متحدہ کے ادارہ برائے انسانی حقوق کی خیر سگالی سفیر کی حیثیت سے خدمات انجام دینے والی ماہرہ خان نے کہا ہے کہ یہ لوگ بھی ہماری مہربانی اور ہمدردی کے محتاج ہیں، ان کو واپس جانے کی صورت میں خطرات کا سامنا ہے۔
انہوں نے کہا کہ کوئی بھی اپنی مرضی سے اپنا گھر پیچھے نہیں چھوڑتا، کئی دہائیوں سے ہم نے ضرورتمند افغان بھائیوں اور بہنوں کو تحفظ فراہم کیا ہے۔میں اپنی قوم سے اپیل کرتی ہوں کہ وہ ان لوگوں کی حمایت جاری رکھیں جنہیں اس کی ضرورت ہے۔
یاد رہے کہ حکومت کی جانب سے پاکستان میں غیر قانونی طور پر رہائش رکھنے والے تمام غیر ملکیوں کو بےدخلی کے لیے 31 اکتوبر کی ڈیڈ لائن دی گئی تھی جس کے بعد غیر قانونی مقیم افغان تارکین ملک چھوڑ نے کا سلسلہ جاری رکھے ہوئے ہیں۔ ماہرہ خان کے بیان کے بعد سوشل میڈیا صارفین نے کڑی تنقید کا نشانہ بنایا ہے۔