بھارت میں جاری کرکٹ ورلڈکپ کے دوران پاکستان کو شکست دینے پر افغان کھلاڑیوں کے ساتھ ملکر بھنگڑے ڈالنے والے عرفان پٹھان آسٹریلیا کے ہاتھوں افغانستان کی شکست کے بعد سوشل میڈیا پر ٹرینڈنگ میں آگئے۔
پاکستان کیخلاف ہمیشہ زہر اگل کر خود کو سچا ہندوستانی ثابت کرنے کی کوشش کرنے والے عرفان پٹھان نے پاکستان کیخلاف افغانستان کی جیت پر چنئی کے گراؤنڈ میں رقص کیا تھا جس پر پوری دنیا نے عرفان پٹھان کی شرمناک حرکت کی مذمت کی تھی۔
آسٹریلیا کے خلاف افغانستان کی یقینی فتح شکست میں بدل جانےکے بعد سوشل میڈیا پر آئی سی سی ورلڈکپ کے کمنٹری پینل میں شامل عرفان پٹھان کا نام ٹرینڈ کرنے لگا اور کرکٹ شائقین عرفان پٹھا ن کو ڈھونڈھتے رہے۔
سوشل میڈیا پر گلین میکسویل کی تعریفوں کے ساتھ ساتھ کرکٹ شائقین عرفان پٹھان پر طنز اور تنقید کرنا بھی نہیں بھولے اورآسٹریلیا کے ہاتھوں افغانستان کی شکست کے فوری بعد سوشل میڈیا پر پر میمز کا سلسلہ شروع ہوگیا۔
صارفین عرفان پٹھان سے سوال کرنے لگے کہ وہ کب ڈانس کریں گے۔ ایک صارف نے مسٹر بین والی طنزیہ پوسٹ کی کہ عرفان پٹھان کا ڈانس اپلوڈ ہو رہا ہے، ایک صارف نے میمز کے ساتھ پوسٹ کی کہ میکسویل کی یہ اننگز عرفان پٹھان کے ڈانس کی حقدار ہے۔