نیوزی لینڈ کے ہاتھوں سری لنکا کی شکست کے بعد پاکستان کے سیمی فائنل میں پہنچنے کے امکانات تقریباً ختم ہوچکے ہیں تاہم پاکستان کی سیمی فائنل کھیلنے کی خواہش ابھی بھی پوری ہوسکتی ہے لیکن اس کیلئے بہت مشکل مرحلے سے گزرنا پڑے گا۔
بھارت، جنوبی افریقا اور آسٹریلیا پہلے ہی سیمی فائنل کیلئے کوالیفائی کرچکے ہیںاور چوتھی ٹیم کے لیے نیوزی لینڈ پاکستان اور افغانستان کے درمیان مقابلہ تھاتاہم سری لنکا کے خلاف بھاری مارجن سے جیت کے بعد کیویز کا راستہ بہت آسان ہوگیا ہے۔
اگر سری لنکا نیوزی لینڈ کو ہرادیتا تو پاکستان کیلئے سیمی فائنل میں پہنچنا آسان ہوسکتا تھا کیونکہ پاکستان اور افغانستان کو سیمی فائنل میں پہنچنے کے لیے اپنا آخری میچ تو جیتنا ضروری ہی تھا تاہم اب کم رن ریٹ کی وجہ سے افغانستان اور پاکستان انتہائی مشکل میں آگئے ہیں۔
سری لنکا کو شکست دینے کے بعد نیوزی لینڈ اپنا آخری گروپ میچ جیت کر 10 پوائنٹس کے ساتھ پوائنٹس ٹیبل پر چوتھے نمبر پر آگیا ہے۔افغانستان اور پاکستان 8 ،8 پوائنٹس کے ساتھ پانچویں اور چھٹے نمبر پر موجود ہیں۔
پاکستان کو کل انگلینڈ کا سامنا کرنا ہے جبکہ افغان ٹیم اور پاکستان کا اب آخری میچ میں جیت کے باوجود کم رن ریٹ کی وجہ سے ناک آؤٹ مرحلے میں پہنچنا بظاہر ناممکن ہوگیا ہے۔
پاکستان موجودہ صورتحال میں ایسے سیمی فائنل میں جاسکتا ہے کہ پاکستان نے انگلینڈ کے خلاف اگر 300 رنز بنائے تو پھر وہ انگلش ٹیم کو 13 رنز پر آؤٹ کرے۔ پاکستان نے انگلینڈ کے خلاف اگر350 رنز بنائے تو پھر وہ انگلش ٹیم کو 62 رنز پر آؤٹ کرے۔
پاکستان نے انگلینڈ کے خلاف اگر 400 رنز بنائے تو وہ پھر انگلش ٹیم کو 112 رنز پر آؤٹ کرے۔پاکستان نے انگلینڈ کے خلاف اگر 450 رنز بنائے تو پھر وہ انگلش ٹیم کو 161 رنز پر آؤٹ کرے۔اگر انگلینڈ پہلے بیٹنگ کرے اور پاکستان اسے 50 رنز پر محدود کر دے تو گرین شرٹس کو 2.5 اوورز میں ہدف مکمل کرنا ہوگا۔