راتوں رات امیر بننا ہر غریب کا اولین خواب ہوتا ہے، کچھ لوگ اپنی محنت سے اپنے خواب کو پورا کرنے کی کوشش کرتے ہیں اور کچھ لوگ لاٹری کا انتظار کرتے ہیں اور حیرت کی بات تو یہ ہے کہ اکثر لاٹری لگ بھی جاتی ہے تاہم بھارت میں ایک دلچسپ واقعہ پیش آیا جس میں ایک ردی والا منٹوں میں کروڑ پتی بنا اور پھر واپس کنگال بھی ہوگیا۔
بھارتی ریاست کرناٹکا کے شہر بنگلورو میں ردی جمع کرنے والے 23 سالہ سلمان شیخ کو ردی جمع کرنے کے دوران ڈالرز اور بھارتی کرنسی کے 23 بنڈل ملے جن کی قیمت 3 ملین امریکی ڈالریاتقریباً 25 کروڑ بھارتی روپے تھی۔
سلمان شیخ سہانے مستقبل کے خواب دیکھتا رہا ہے اورڈالرز سے واقفیت نہ ہونے کی وجہ سے اس نے اپنے ٹھیکیدار سے بات کی جس کے بعد خبر پولیس تک پہنچ گئی۔
واقعہ کی اطلاع پھیلنے کے بعد ایک گینگ نے سلمان کے ٹھیکیدار کو رقم لینے کی کوشش میں اغوا کرلیا تاہم بعد میں چھوڑ دیا ۔ اسی دوران پولیس نے پولیس نے کارروائی کرتے ہوئے پتہ لگایا کہ کرنسی جعلی ہے۔
پولیس کی جانب سے کرنسی کو جعلی قرار دینے کے بعد سلمان شیخ، ٹھیکیدار اور اغوا میں ملوث گینگ کے ارمانوں پربھی اوس پڑگئی ہے۔