بھارت میں جاری کرکٹ ورلڈکپ میں جہاں بھارت نے گزشتہ روز نیدر لینڈ کیخلاف اپنے آخری گروپ میچ میں ناقابل شکست رہنے کا شاندار ریکارڈ قائم کیا وہیں بھارتی ٹیم کے سابق کپتان ویرات کوہلی نے بھی ایک منفرد ریکارڈ بنایا جس پر پویلین میں موجود ان کی اہلیہ انوشکا شرما خوشی سے ناچنے لگ گئیں۔
بنگلورو میں کھیلے جانے والے بھارت کے آخری میچ کو دیکھنے کیلئے ویرات کوہلی کی اہلیہ انوشکا شرما بھی اسٹیڈیم میں موجود تھیں۔ میچ میں بھارت نے نیدرلینڈز کو 160 رنز سے شکست دے دی۔
اس میچ میں ویرات کوہلی نے بھی بولنگ کروائی، انہوں نے تین اوور میں 13 رنز دے کر ایک وکٹ حاصل کرلی،ورلڈکپ میں نیدرلینڈز کے خلاف ویرات کوہلی کی بولنگ دیکھ کر ان کی اہلیہ بالی ووڈ اداکارہ انوشکا شرما خوشی سے نہال ہوگئیں اور اسٹینڈ میں خوشی سے ناچنے کی ویڈیو سوشل میڈیا پر وائرل ہوگئی۔
ویرات کوہلی نے اپنی بولنگ کے دوران جب نیدرلینڈز کے کھلاڑی کو آؤٹ کیا تو اس دوران وی آئی پی انکلوژر میں بیٹھی ان کی اہلیہ انوشکا شرما بھی جشن مناتی نظر آئیں۔انوشکا نے ویرات کوہلی کی طرح اپنے ہاتھوں کو بلند کرکے خوشی کا اظہار کیا۔
یاد رہے کہ بھارت نے آئی سی سی کرکٹ ورلڈکپ میں ناقابل شکست رہتے ہوئے سیمی فائنل تک رسائی حاصل کی ہے اور ناک آؤٹ میچ میں بھارت کا مقابلہ نیوزی لینڈ سے ہوگا۔