گھروں میں چھوٹے چھوٹے پالتو جانوروں کی شرارتیں اکثر مالکان کے ساتھ ساتھ مہمانوں کی بھی دلچسپی کا سبب بن جاتے ہیں لیکن کبھی کبھی ان ننھے منے جانوروں کی شرارتیں خود ان کیلئے بھی نقصان دہ بن جاتی ہیں۔
غیر ملکی میڈیا کے مطابق مولی نامی 10 سالہ چھوٹی سی کتیا نے انجانے میں مالک کے تین موزے نگل لیے۔ مالک کو واقعے کا علم تب ہوا جب مولی نے کھانے پینے سے انکار کر دیا۔
کتیا کی طبیعت بگڑ گئی اور وہ الٹیاں بھی کرنے لگی۔مالک مولی کو جانوروں کے اسپتال لے گئی جہاں اس کا ایکسرے کیا گیا اور مزید ٹیسٹ کرنے پر معلوم ہوا کہ مولی نے مالک کے تین موزے نگل لیے ہیں۔
مولی کا نظام ہاضمہ مکمل بند ہوگیا تھا جس کی وجہ سے وہ کھانے پینے سے قاصر تھی۔پیٹ سے موزے نکالنے کیلئے مولی کی گیسٹرو ٹومی اور اینٹرو ٹومی کے ذریعے ایمرجنسی سرجری کی گئی اور اسے دو دن تک آئی سی یو میں رکھا گیا۔
کامیاب سرجری کے بعد مولی کی صحت میں بہتری آنے پر اسے اسپتال سے روانہ کردیا گیا اور اب وہ پھر سے پہلے کی طرح کھیل کود کرتی ہے۔
یاد رہے کہ پالتو جانور پالنے کا شوق تو بہت سے لوگوں کو ہوتا ہے لیکن ان کی دیکھ بھال کی ذمہ داری ایک بہت مشکل کام ہے جس کیلئے مالک کو ہر وقت چوکنا رہنا پڑتا ہے ورنہ مولی جیسی شرارت سے بہت مشکل پیدا ہوجاتی ہے۔