بھارت میں 19سال پہلے مرنے والے شخص نے دوبارہ زندہ ہوکر پورے بھارت میں تہلکہ مچادیا، مردہ شخص نے زندہ ہونے کے بعد حکومت سے اسلحے کا لائسنس بھی مانگ لیا۔
بھارت میں مذہبی دارالحکومت اور مندروں کا شہر کہلانے والے وارنسی شہر میں 19 سال تک ریونیو ریکارڈ میں مردہ قرار دیے جانے والے لال بہاری مرتک نے اپنی زندہ حیثیت کو دوبارہ حاصل کرلیا ہے۔
لال بہاری مرتک 1994 سے لے کر 1975 تک ریونیو ریکارڈ میں مردہ رہے۔ اپنے زندہ ہونے کا ثبوت دینے کے لیے انہوں نے 19 سال تک بیوروکریسی سے جنگ کی اور خود آپ کو زندہ ثابت کرنے کیلئے الیکشن بھی لڑا۔
خود کو زندہ ثابت کرنے کے بعد لال بہاری مرتک کو اب حقیقت میں اپنی زندگی کے لالے پڑے ہوئے ہیں کیونکہ انہوں نے ریونیو ریکارڈ میں مردہ قرار دیئے جانے والے زندہ افراد کو زندہ ثابت کرنے کی جدوجہد شروع کردی ہے۔
لال بہاری کا کہنا ہے کہ مجھے اپنے لیے اور متاثرہ لوگوں کے لیے جدوجہد کی وجہ سے جان کو خطرہ ہے ، اس لئے مجھے AK-47 رائفل کا لائسنس حاصل کرنے کی اجازت دی جائے۔
یاد رہے کہ لال بہاری کو اپنے انتقال کا اس وقت معلوم ہوا جب انہوں نے بینک لون کے لیے درخواست دی اور انہیں ریونیو ریکارڈ میں مردہ قرار دیا ہوا تھا۔لال بہاری کے چاچا نے رشوت دے کر لال بہاری کو مردہ قرار دلوایا اور ان کی زمین اپنے نام کرلی تھی۔