انٹربورڈز کوارڈی نیشن کمیٹی نے پورے ملک میں میٹرک اور انٹر بورڈ کے طلبہ کیلئے نمبرز سسٹم ختم کرکے گریڈ سسٹم متعارف کروادیا ہے۔
چیئرمین آئی بی سی سی غلام علی ملاح کے مطابق 2024 میں نویں اور گیارہویں جماعت کے طلبہ کو نمبرز کے بجائے گریڈ دیا جائے گا،آئی بی سی سی کے تحت میٹرک اور انٹر امتحانات میں گریڈ سسٹم متعارف کرایا ہے۔
چیئرمین آئی بی سی سی غلام علی ملاح کا کہنا ہے کہ دنیا بھر میں گریڈ سسٹم موجود ہے، بچوں کو نمبرز کی دوڑ سے نکال کر انہیں اچھی تعلیم دینی ہے، نمبرز سسٹم کے متبادل گریڈنگ سسٹم طلبہ کیلئے زیادہ فائدہ مند ثابت ہوگا۔
یاد رہے کہ گزشتہ روز سندھ حکومت نے اسکولوں میں سردیوں اور گرمیوں کی چھٹیوں اور امتحانات کا شیڈول بھی اعلان کیا تھا۔صوبے بھر کے اسکولوں میں نیا تعلیمی سال 15 اپریل اور کالجوں میں نیا تعلیمی سال یکم اگست سے شروع کرنے کا فیصلہ کیا گیا ہے۔
سندھ کے اسکولوں میں نیا تعلیمی سال 15 اپریل سے شروع ہوگا، گرمی اور سردی کی چھٹیوں کا شیڈول برقراررکھا گیا ہے، میٹرک کے امتحانات مئی کے پہلے ہفتے جب کہ انٹرمیڈیٹ کے امتحانات مئی کے آخری ہفتے سے شروع ہوں گے
میٹرک کے نتائج 31 جولائی اور انٹرکے نتائج اگست کے دوسرے ہفتے تک آئیں گے جب کہ موسم گرما کی تعطیلات میں اساتذہ کے لیے 15 روز کا تربیتی سیشن کیا جائے گا۔