قومی کرکٹ ٹیم کے سابق کپتان انضمام الحق نے انکشاف کیا ہے کہ محمد یوسف نے ویسٹ انڈیز کے لیجنڈری بلے باز برائن لارا کو اسلام کی دعوت دی جس پر وہ متاثر ہوئے تھے جبکہ ہربھجن سنگھ نے بھی کہا تھا کہ میرا دل چاہتا ہے مولانا کی بات مان لوں۔
سوشل میڈیا پر وائرل بیان میں انضمام الحق کہا کہ کراچی میں ویسٹ انڈیز کے خلاف ٹیسٹ میچ کے دوران محمد یوسف نے برائن لارا کو کھانے پر مدعو کیا اور پروگرام بنایا کہ انہیں دین کی دعوت دی جائے۔
انضمام الحق نے بتایا کہ کراچی کے ایک بزرگ نے برائن لارا کو دین کی دعوت دی اور بتایا کہ ہم کس طرح اپنے اللہ کی بات مانتے ہیں، کس طرح حضور اکرم ﷺ کے طریقے پر زندگی گزار رہے ہیں۔
انضمام الحق کا کہنا تھا کہ برائن لارا یہ سُن کر متاثر ہوتے ہوئے کہا کہ واقعی زندگی اسی طرح سے گزارنی چاہیے اور ہماری زندگی اس طرح سے ہونی چاہیے۔
انضمام الحق نے یہ بھی بتایا کہ سابق بھارتی کرکٹر ہربھجن سنگھ نے کہا تھا کہ میرا دل چاہتا ہے کہ مولانا کی بات مان لوں مگر تمھیں دیکھ کر رک جاتا ہوں کیونکہ تمہاری زندگی اُس طرح کی نہیں۔
یاد رہے کہ پاکستان کرکٹ ٹیم کے سابق کپتان انضمام الحق اس سے پہلے بھی برائن لارا کے حوالے سے یہ واقعہ بتاچکے ہیں تاہم برائن لارا کی طرف سے اس کی کوئی تردید یا تصدیق سامنے نہیں آئی۔