فنکاروں اور مداحوں کا ہمیشہ سے چولی دامن کا ساتھ ہے کیونکہ مداحوں کی پسندیدگی کے بغیر کوئی بھی فنکار کامیابی کی سیڑھی نہیں چڑھ سکتا لیکن بعض فنکار کامیابی کے بعد اکثر مداحوں کے ساتھ ہتک آمیز رویہ اختیار کرتے ہیں جیسا کہ حال ہی میں نانا پاٹیکر نے کیا۔
سوشل میڈیا پر وائرل ویڈیو میں دیکھا گیا کہ ایک مداح نے فلم سیٹ پر آکر نانا پاٹیکر کیساتھ سیلفی لینے کی کوشش کی، جیسے ہی مداح نانا پاٹیکر کے پیچھے سے آکر سیلفی لینے لگا تو اداکار نے اس کے سر پر تھپڑ مار دیا اورفلم کریو نے نوجوان کو گردن سے پکڑ کر نیچے اتار دیا۔
مداح کے ساتھ نامناسب رویئے پر سوشل میڈیا صارفین نے نانا پاٹیکر شدید تنقید کا نشانہ بنایا ۔ سوشل میڈیا صارفین کا کہنا ہے کہ ہم عام لوگ ان اداکاروں اور کھلاڑیوں کو عظیم ہستیوں کا درجہ دیتے ہیں لیکن ہمیں ان سے تھپڑ اور لاتوں کےلیے تیار رہنا چاہیے۔
ایک صارف نے لکھا کہ میں نانا پاٹیکر کا بڑا پرستار تھا، لیکن اب نہیں، ایسا رویہ ناقابل قبول ہے۔ ہدایت کار، پروڈیوسر کے پاس اتنی سیکیرٹی ہونی چاہیے کہ وہ سیٹ پر آنے والے کسی کو بھی روک سکے لیکن نانا کا رویہ بہت برا ہے اور میں ڈائریکٹر اور سیکورٹی اسٹاف کو مورد الزام ٹھہراؤں گا لیکن میں اب نانا کا مداح نہیں ہوں۔
ایک صارف نے کہا کہ اس لڑکے کو بوڑھے نانا پاٹیکر کو تھپڑ مارنا چاہیے تھا اور بڈھے کو اتر پردیش کی سرزمین سے باہر نکال دینا چاہیے تھا۔