ورلڈکپ کے فائنل میں بھارت کی شکست پر سوشل میڈیا صارفین نے بھارتی ٹیم کے سابق بالر عرفان پٹھان کو نشانے پر رکھ لیا، عرفان پٹھان کے ڈانس اور بھارت میں فوتگی کے حوالے سے میمز کی بھرمار ہوگئی۔
افغانستان کے ہاتھوں پاکستان کی شکست پر ناچ کر جشن منانے والے عرفان پٹھان کو سوشل میڈیا صارفین نے فائنل میں شرمناک شکست پر بھرپور جواب دیا۔سوشل میڈیا صارفین بڑی تعداد میں عرفان پٹھان کو ٹرول کرتے رہے۔
عرفان پٹھان نے افغانستان سے پاکستان کی غیر متوقع شکست پر بیگانی شادی میں عبداللہ دیوانے کے مصداق کمنٹری باکس سے نکل کر افغان بولر راشد خان کے ساتھ گراؤنڈ میں رقص کیا جب کہ دیگر مواقع پر بھی پاکستان پر طنز کرتے نظر آئے۔
گزشتہ روز جب پورے ٹورنامنٹ میں نا قابل شکست بھارت احمد آباد کے نریندر مودی اسٹیڈیم میں کھیلے گئے فائنل میں سوا لاکھ شائقین کرکٹ کے سامنے آسٹریلیا کے ہاتھوں چاروں شانے چت ہوکر تیسری بار عالمی چیمپئن بننے کا خواب پورا نہ کر سکا تو پاکستان کرکٹ کے فینز کو بھی جواب دینے کا بھرپور موقع مل گیا ۔
پی ایس ایل میمز نامی اکاؤنٹ سے فائنل کے ہیرو ٹریوس ہیڈ کی تصویر شیئر کی اور ساتھ ہی لکھ دیا کہ ’یہاں آؤ عرفان پٹھان تمہیں ڈانس کرواؤں۔‘ایک اور اکاؤنٹ کی جانب سے عرفان پٹھان کی ڈانس کی ویڈیوز شیئر کرکے پوچھا گیا کہ ’کیسے رہا آپ کا سنڈے؟‘
کریم پاکستان کی جانب سے ’ایکس‘ پر عرفان پٹھان کی ایک پوسٹ پر تبصرہ کرتا ہوئے لکھا کہ ’کیسا جا رہا ہے پھر سنڈے عرفان پٹھان؟‘احتشام الحق نے ’ایکس‘ پر ایک پوسٹ میں لکھا کہ اگلی مرتبہ شکست پر کسی اور کا مذاق مت اُڑائیے گا۔ صرف آپ کی وجہ سے لوگوں کو پوری انڈین ٹیم کا مذاق بنانا پڑا۔
یاد رہے کہ عرفان پٹھان پاکستان کرکٹ ٹیم کے حوالے سے ہمیشہ نفرت انگیز بیانات دیتے ہیں اور افغانستان کے ہاتھوں پاکستان کی شکست پر عرفان پٹھان نے کمنٹیٹر ہوتے ہوئے غیر مہذب انداز اختیار کیا تھا جس پر انہیں تنقید کا نشانہ بنایا جارہا ہے۔