شہد انسان کے لیے اللہ تعالیٰ کی عطا کردہ ایک بیش قیمت نعمت ہے، تمام غذائی نعمتوں میں شہد کو ایک ممتاز درجہ حاصل ہے، قرآن کریم شہد کے بارے میں فرماتا ہے (حدیث نبوی کا مفہوم) شہد ہر جسمانی مرض کا علاج ہے اور قرآن کریم ہر روحانی مرض کا علاج، میں قرآن اور شہد دونوں اکسیروں کی سفارش کرتا ہوں۔
بے پناہ فوائد کی وجہ سے ہر موسم اور حالات میں شہد کی اہمیت اور افادیت برقرار رہتی ہے جس کی وجہ سے جعلی شہد بھی مارکیٹ میں فروخت کیا جاتا ہے تاہم کراچی کے مشہور حکیم شاہ نذیر نے خالص اور جعلی شہد کی پہچان کا آسان سا گھریلو نسخہ بتادیا ہے۔
حکیم شاہ نذیر کہتے ہیں کہ آج کل نزلہ، زکام،کھانسی سمیت دیگر وائرل انفیکشن بہت عام ہیں ۔سردیوں میں اس قسم کی وبائی بیماریوں سے بچنے اور جسمانی صحت کو تر وتازہ رکھنے کے لیے خالص شہد کا استعمال انتہائی فائدے مند ہے۔
شہد ایک بہترین اینٹی آکسیڈنٹ ہے، جس میں پروٹین ، نامیاتی ایسڈز، شکر اور دیگرمرکبات شامل ہیں اور اس کا اسی فیصد حصہ مٹھاس پر مبنی ہوتا ہے۔انھوں نے سردیوں میں کھانسی سے نجات کے لئے نسخہ بتاتے ہوئے کہا کہ فلفل دراز لے لیں ، فلفل دراز ایک کالی مرچ کی قسم ہوتی ہے اور لمبی ہوتی ہے۔
حکیم شاہ نزید نے بتایا کہ فلفل دراز لے کر اسے باریک پاؤڈر بنالیں اور اس کی ایک چٹکی ایک چمچ شہد میں ملاکر روزانہ ایک بار کھائیں ، اس سے ہر قسم کی کھانسی ختم ہوجائے گی ساتھ ہی بلغم اور ریشہ بھی ختم ہوجائے گا۔
حکیم شاہ نذیر نے خالص اور جعلی شہد میں فرق جاننے کا گھریلو نسخہ بتاتے ہوئے کہا جن لوگوں کو اصلی شہد کی پہچان کرنی ہوں، اس کے لئے ایک چمچ شہد لے کر ایک گلاس دودھ میں ڈالیں ، اگر دودھ پھٹ جائے تو شہد نقلی ہے کیونکہ اگر شہد چینی یا کسی اور چیز سے تیار کیا جاتا ہے تو اس کو صاف کرنے کے لئے پھٹکری ڈالی جاتی ہے اور پھٹکری دودھ پھاڑ دیتی ہے۔