سوشل میڈیا پلیٹ فارم نے ایپلیکیشن کی میموری کو بچانے اور تصاویر اور ویڈیوز کی رازداری کے تحفظ کے لئے اگست 2021ء میں ”ویو ونس“ فیچرمتعارف کروایا تھا۔ اس فیچر کے تحت بھیجی گئی تصویر یا ویڈیو چیٹ کو کھولنے کے بعد اسکرین سے غائب ہوجاتی ہے۔
پہلے یہ سہولت صرف موبائل ایپ کے لیے دستیاب تھی لیکن اب اس سہولت سے ڈیسک ٹاپ ورژن بھی فائدہ حاصل کرسکیں گے۔
میٹا کی ملکیت واٹس ایپ کے اپ ڈیٹس کو ٹریک کرنے والی سائٹ WABetaInfo کے مطابق، اس فیچر کو واٹس ایپ کے ویب ورژن اور ڈیسک ٹاپ ایپ پر متعارف کرایا گیا ہے۔
اس فیچر کے ذریعے صارفین ایسے پیغامات بھیج سکیں گے جو ایک بار دیکھنے کے بعد خود بخود غائب ہو جائیں گے۔
ویب ورژن یا ڈیسک ٹاپ ایپ پر جب کوئی صارف کوئی تصویر یا ویڈیو اپ لوڈ کرتا ہے تو وہاں ایک 1 آئیکون ظاہر ہوتا ہے، جس پر کلک کرکے پیغام کو ایک بار ویڈیو کے طور پر بھیجا جاسکتا ہے۔
اس فیچر کی خاص بات یہ ہے کہ یہ صارفین کو حساس معلومات جیسے پاس ورڈ یا کریڈٹ کارڈ کی تفصیلات وغیرہ کو لیک ہونے کے خطرے کے بغیر شیئر کرنے کی اجازت فراہم کرے گا۔ جس سے صارفین کا ایک دیرینہ مسئلہ حل ہوجائے گا۔