پاکستان اور بھارت سمیت کئی ممالک میں شادی کے موقع پر نوٹ نچھاور کرنا اور دلہا کو نوٹوں کے ہار پہنانا عام سی روایت بن چکی ہے جبکہ پاکستان میں کئی شادیوں پر تو ڈالر اور موبائل فونز تک لٹانے کے واقعات بھی پیش آچکے ہیں تاہم اب بھارت میں ایک ایسا دلہا سامنے آیا ہے جس کو 20 لاکھ روپے کا نوٹوں کا ہار پہنایا گیا۔
بھارت کے چھوٹے سے گاؤں سے تعلق رکھنے والے دولہا کے ہار میں تقریبا 20 لاکھ بھارتی مالیت کے نوٹ لگے ہوئے تھے۔ وائرل ویڈیو میں دلہا شادی کے موقع پر اپنے گھر کی چھت پر کھڑا نظر آ رہا ہے اور اس کے گلے کا کئی میٹر طویل ہار ہے جس میں بھارتی مالیت کے 500 روپے کے 20 لاکھ روپے مالیت کے نوٹ لگے ہوئے ہیں۔
واضح رہے کہ بھارت کے گاؤں دیہاتوں میں معیار زندگی انتہائی پسماندہ ہے تاہم جہیز اور شادی بیاہ پر بے جا اسراف بھی بہت عام ہے جس کی وجہ سے غریب غربا لوگ بھی شادیوں پر دکھاوے کیلئے قرض لیتے اور پھر ساری زندگی اس کی بھرپائی کرتے ہیں۔
اس دلہا کا گھر بھی ویڈیو میں واضح دکھائی دے رہا ہے جس کو دیکھ کر بالکل بھی 20 لاکھ کے نوٹوں کے ہار کا تصور کرنا ناممکن ہے تاہم صرف دکھاوے کیلئے یہ سب کرنے پر سوشل میڈیا صارفین نے شدید ردعمل کا اظہار کیا ہے۔