بالی ووڈ اداکار شاہ رخ خان بھارت ہی نہیں بلکہ پوری دنیا میں اپنی ایک منفرد پہچان رکھتے ہیں، برسوں سے فلم انڈسٹری پر راج کرنے والے شاہ رخ خان کے مداحوں کی تعداد کروڑوں میں ہے اور کنگ خان کا اسٹائل کاپی کرنا ہر مداح کی خواہش ہوتی ہے تاہم کئی بار مداح اوور ایکٹنگ کی وجہ سے دوسروں کیلئے ہنسی کا سبب بن جاتے ہیں۔
سوشل میڈیا پر وائرل ایک ویڈیو میں بالی ووڈ کے دبنگ ہیرو سلمان خان کے ساتھ ایک شخص موجود ہے جو آنکھوں پر سیاہ چشمہ لگائے شاہ رخ خان کو کاپی کرنے کی کوشش کررہا ہے۔
ویڈیو میں موجود شخص شاہ رخ کی بلاک بسٹر فلم ’پٹھان‘ کا مقبول ترین ڈائیلاگ بول رہا ہے اور آواز بھی شاہ رخ خان کی ہی نکالتا ہے اور اس کی حرکت پر سلمان خان بے ساختہ ہنس پڑتے ہیں جس کی ویڈیو سوشل میڈیا پر وائرل ہوگئی۔
شاہ رخ خان کو کاپی کرنے والا شخص یہ ڈائیلاگ بولنے کے لیے مزید تین ری ٹیکس لیتا ہے اور ہر بار سلمان خان کی ہنسی چھوٹ جاتی ہے۔جب وہ شخص ری ٹیک لے رہا ہوتا ہے تو سلمان خان اپنی ہنسی پر قابو نہ پاتے ہوئے اشارے سے فریم سے نکلنے کا کہتے ہیں۔
یہ دلچسپ ویڈیو سوشل میڈیا پر وائرل ہورہی ہے جہاں صارفین کی جانب مزاحیہ تبصروں کا سلسلہ جاری ہے۔ سوشل میڈیا صارفین نے کنگ خان کی کاپی کرنے والے نوجوان کو چائنہ کی کاپی، لنڈے کا شاہ رخ خان، سستا شاہ رخ اور طرح طرح کے القابات سے بھی نوازا ہے۔