پاکستان کی مشہور اداکارہ عائشہ عمر نے کہا ہے کہ مرد کے رویے کو سمجھنے کے لیے ایک عورت کی زندگی میں والد کی موجودگی ضروری ہے۔
نجی ٹی وی کے شو میں بات چیت کرتے ہوئے عائشہ عمر نے بتایا کہ گریجویشن کے بعد ایک ایسے شخص کی محبت میں گرفتار تھی جو مجھے مسلسل تشدد کا نشانا بناتا تھا اور پھر بار بار اپنی غلطی کا اعتراف کرکے معافی بھی مانگتا تھا۔وہ شخص مجھ سے کہتا تھا کہ مجھ سے یہ بات برداشت نہیں ہوتی کہ کوئی اور تم سے بات کرے یا تمہیں دیکھے۔
اداکارہ نے بتایا کہ میں نے بغیر باپ کے پرورش پائی ہے، اس لیے مجھے مرد کے رویے کو سمجھنے میں بہت وقت لگا اور مجھے اس بات کی سمجھ دیر سے آئی کہ مرد کی کن باتوں کو برداشت کرنا چاہیے اور کن باتوں کو نہیں۔
عائشہ عمر نے بتایا کہ میں اُس شخص کی ان جذباتی باتوں کو سچا پیار سمجھتی تھی کیونکہ میں اس وقت اتنی زیادہ سمجھدار نہیں تھی اور ایک وجہ یہ بھی ہے کہ میں بغیر باپ کے بڑی ہوئی ہوں۔ہم دونوں شادی کرنے والے تھے لیکن خوش قسمتی سے میں بچ گئی۔
انہوں نے کہا کہ جس لڑکی نے زندگی میں اپنے والد کو نہیں دیکھا ہوتا یا اپنے والدین کو ایک ساتھ زندگی گزارتے نہیں دیکھا ہوتا، اسے اس بات کی بالکل سمجھ نہیں ہوتی کہ ایک مرد کو ایک عورت کے ساتھ کس طرح پیش آنا چاہیے۔