شوبز انڈسٹری میں اکثر کچھ فنکاروں پر ایک مخصوص چھاپ لگ جاتی ہے، مصطفیٰ قریشی، شفقت چیمہ، نیئر اعجاز جیسے سینئر فنکار ولن کے کردار کی وجہ سے مداحوں کے نزدیک حقیقی زندگی میں بھی ولن سمجھے جاتے ہیں جس کی وجہ سے نیئر اعجاز کو تو ایک بار ایک خاتون مداح نے حقیقت میں تھپڑ بھی ماردیا تھا، ایسے ہی اداکار آغا علی بھی شوبز میں مخصوص چھاپ کی وجہ سے ہیروئنزنہیں بلکہ ان کے منگیتروں کیلئے ناپسندیدہ بن چکے ہیں۔
اداکار آغا علی ایک ٹی وی شو کے دوران انکشاف کیا ہے کہ اکثر اداکاراؤں کے منگیتر انہیں میرے ساتھ کام کرنے سے منع کردیتے تھے کیونکہ لوگ یہ سمجھتے تھے کہ میں جیسے کردار نبھاتا ہوں میں اصل زندگی میں بھی ویسا ہی ہوں۔
انہوں نے بتایا کہ کئی سال پہلے لاہور میں میرے کام پر پابندی لگادی گئی تھی کیوں کہ میں نے ایک پروڈیوسر کو انٹرویو کے دوران تلخ جواب دیے تھے جس کے بعد انہوں نے مجھے ایک سائن کیے ہوئے پراجیکٹ سے بھی نکال دیا تھا۔
آغا علی نے بتایا کہ 2016 ، 2017 میں جو ڈرامہ بھی سائن کرتا تو کئی بار ایسا ہوا اداکاراؤں کے منگیتر نے انہیں میرے ساتھ کام کرنے سے منع کردیا۔ایک بار پروڈیوسر نے بتایا کہ اداکارہ کے منگیتر انہیں آپ کے ساتھ کام کرنے کی اجازات نہیں دے رہے۔
یاد رہے کہ آغا علی 1980ء اور 1990ء کی دہائی میں مشہور اداکارآغا سکندر اور روبینہ سکندر کے بیٹے جبکہ افسانوی گلوکار، اداکار اور پروڈیوسر عنایت حسین بھٹی کے نواسے ہیں۔ فنکاروں کے گھرانے سے تعلق رکھنے والے آغا علی درجنوں ڈراموں میں مختلف کردار ادا کرچکے ہیں۔