میں حجاب کرنا چاہتی ہوں لیکن اگر میں نے حجاب کیا تو میرا کیرئیر ختم ہوجائے گا۔ یہ کہنا ہے پاکستانی شوبز انڈسٹری کی معروف اداکارہ مائرہ خان کا جنہوں نے حال ہی میں ایک پوڈ کاسٹ میں شرکت کی۔
اداکارہ مائرہ خان نے ایف ایچ ایم پوڈکاسٹ میں بطور مہمان خصوصی شرکت کی جہاں اُنہوں نے اپنے کیریئر، ناک کی سرجری اور شادی سے متعلق دیگر موضوعات پر بات کی۔
پوڈ کاسٹ سے ایک کلپ سوشل میڈیا پر وائرل ہو رہا ہے جس میں مائرہ خان حجاب سے متعلق اپنی مجبوری پر بات کرتی دکھائی دیں۔
انہوں نے کہ ایک طرف کترینہ کیف بولڈ لباس میں ہیں اور دوسری جانب میں قمیض شلوار میں ہوں تو لوگ مجھے چھوڑ کر کترینہ کیف کو دیکھنا پسند کریں گے۔
اداکارہ کاکہنا تھا کہ ہمارے ہاں لوگ بولڈ لباس پہننے والی اداکاراؤں پر تنقید بھی زیادہ کرتے ہیں اور دیکھنا بھی انہیں ہی پسند کرتے ہیں۔
مائرہ خان نے کہا کہ ہم عرب ممالک کو دیکھیں تو وہاں حجاب کا ہی کلچر نظر آتا ہے کیونکہ وہاں ایک نظام موجود ہے کہ چاہے اداکارہ ہو، ماڈل ہو یا اینکر ہو، سب نے لازمی حجاب پہننا ہے جبکہ ہمارے یہاں پاکستان میں مِکس کلچر ہے۔
اداکارہ کا کہنا تھا کہ ہم اداکارائیں ڈراموں میں حجاب نہیں کرسکتیں کیونکہ ڈراموں میں ایسے کردار نبھانے ہوتے ہیں کہ ہمیں سر سے دوپٹہ اتارنا پڑتا ہے۔
ان کاانٹرویو میں مزید کہنا تھا کہ ہم اداکارائیں بھی مجبور ہوتی ہیں، اگر میں نے حجاب کرنا شروع کیا تو میرا کیرئیر ختم ہوجائے گا، ہمارے دل میں خوف خدا ہے مگر ہم نے اپنے گھر بھی چلانے ہیں۔