چند روز قبل طویل علالت کی وجہ سے انتقال کرنے والے اداکار خالد بٹ کے وفات سے قبل ریکارڈ ہونیوالا وائس نوٹ سوشل میڈیا پر وائرل ہونے کے بعد مداح جذباتی ہوگئے۔
پاکستان ٹیلی ویژن، فلم اور تھیٹر کے مشہور اداکار خالد بٹ طویل علالت کے بعد 11 جنوری کو اس جہان فانی سے کوچ کر گئے۔انہوں نے اپنے فنی کیرئیر کا آغاز 1970 میں بطور اسسٹنٹ ڈائریکٹر کیا تھا، پھر 1978 میں بطور اداکار پرفارم کرنے کا موقع ملا اور پھر وہ بوٹا فرام ٹوبہ ٹیک سنگھ، دلّی اور دیگر کئی مشہور ڈراموں میں نظر آئے۔
انتقال سے خالد بٹ جذباتی انداز میں اپنے پوتے سے اس کی شادی میں آنے سے معذرت کرتے ہوئے اپنی صحت سے آگاہ کر رہے ہیں۔وائس نوٹ سوشل میڈیا پر تیزی سے وائرل ہوگیا اور مداح اسے سن کر غمزدہ ہوگئے اور مرحوم اداکار کو یاد اور ان کی مغفرت کی دعائیں کرتے دکھائی دیے جبکہ ایک سوشل میڈیا صارف کو ان کی آواز سن کر اپنے والد کی یاد آگئی۔
وائس نوٹ میں خالد بٹ کو کہتے ہوئے سُنا جاسکتا ہے کہ ’شکریہ زاہد صاحب، میں نہیں جانتا کہ آپ کو کیسے بتاؤں۔ میں واش روم بھی نہیں جا سکتا۔ میں بول بھی نہیں سکتا۔ میرا جگر ٹرانسپلانٹ کیا جائے گا، اس نے کام کرنا تقریباً بند کر دیا ہے۔ ڈاکٹروں نے لیور ٹرانسپلانٹ کا مشورہ دیا ہے‘۔
’کل میں پاکستان کڈنی اینڈ لیور انسٹی ٹیوٹ اپنی رپورٹس کے ساتھ جاؤں گا، جہاں وہ جگر اور گردے کی پیوند کاری کریں گے۔ میرا معدہ بھی بہت کمزور ہو گیا ہے، میں صحت کے متعدد مسائل سے نمٹ رہا ہوں‘۔خالد بٹ نے دعاؤں کی اپیل کرتے ہوئے مزید کہا کہ ’میری صحت کے لیے دعا کریں۔
اداکار خالد بٹ کے مداحوں نے مرحوم کے ایصال ثواب اور درجات کی بلندی کی دعابھی کی ہے۔سوشل میڈیا صارفین کا کہنا ہےکہ خالد بٹ کا انتقال شوبز انڈسٹری کا بڑا نقصان ہے اور خالد بٹ کا خلاء پر نہیں ہوسکے گا۔