گوگل میپ کی جانب سے صارفین کے لیے ایک ایسا فیچر اینڈرائیڈ چلانے والوں کے لیے متعارف کرایا جا رہا ہے جس کا استعمال آئی او ایس والے پہلے ہی کر رہے ہیں۔
9 ٹو 5 گوگل کی رپورٹ کے مطابق اینڈرائیڈ کے لیے گوگل میپس ایپ کے اس نئے فیچر سے اینڈرائیڈ صارفین کے لیے موسم کا حال اور فضائی معیار کے بارے میں جاننا اب آسان اور ممکن ہوگا۔
موسم اور فضائی معیار سے متعلق ایک باکس کا آپشن سرچ بار کے نیچے بائیں کونے میں موجود ہوگا، اس باکس میں درجہ حرارت اور فضائی معیار کی تفصیلات موجود ہوں گی جب کہ اس باکس میں موسمی صورتحال جیسے بارش، برفباری یا دیگر موسمی پیشگوئیاں بھی کی جائیں گی۔
جب کوئی صارف اس باکس پر کلک کرے گا تو مزید موسمی تفصیلات جیسے آئندہ 12 گھنٹوں تک درجہ حرارت کا معلوم ہوسکے گا یا گرمی کی شدت کس حد تک محسوس ہوگی وغیرہ جاننے میں مدد ملے گی۔
فضائی معیار کے سیکشن پر کلک کرنے پر ائیر کوالٹی میپ لیئر لوڈ ہوگی، یہ باکس کافی چھوٹا ہوگا اور گوگل میپس پر کچھ سلیکٹ کرنے پر غائب ہو جائے گا۔
رپورٹ میں بتایا گیا کہ یہ فیچر اینڈرائیڈ صارفین کے لیے متعارف کرانے کا سلسلہ جاری ہے۔