راولپنڈی۔19فروری (اے پی پی):اینٹی نارکوٹکس فورس نے ممنوعہ سی بی ڈی آ ئل سے بھرے ویپس کی آن لائن پلیٹ فارم کے ذریعے فروخت میں ملوث نیٹ ورک کے بین الصوبائی گروہ کو گرفتارکر لیا ۔اے این ایف ہیڈکوارٹر راولپنڈی سے جاری بیان کے مطابق سی بی ڈی آئل سے بھرے ویپس کے خلاف اے این ایف نے کامیاب آپریشن کیا اور پاکستان کے 3 بڑے شہروں میں بیک وقت کارروائیاں کی گئیں۔ویپس کی تقسیم میں ملوث بین الصوبائی منشیات فروش گروپ کو نشانہ بنا تے ہوئے 8 افراد گرفتارکئے گئے۔
دوران آپریشن چرس کے تیل سے بھرے ویپس، سی بی ڈی آئل، ٹی ایچ سی آئل، بھنگ کے پودے سے بنے سگریٹ رول برآمد کیے گئے۔اس کے علاوہ چرس کا تیل، افیون اور چرس سمیت دیگر غیر قانونی مواد قبضے میں لے لیا گیا۔ ترجمان نے بتایا کہ ملزمان قدرتی مصنوعات اور ادویات کی فروخت کی آڑ میں غیر قانونی سرگرمیوں میں ملوث تھے۔ای کامرس پلیٹ فارم کو منشیات کی سپلائی کے لیے استعمال کیا گیا۔ملزمان کارگو کمپنیوں کے ذریعے بیرونی ممالک سے ممنوعہ اشیاء درآمد کرتے تھے۔ترجمان نے کہا کہ اے این ایف آن لائن کاروبار کے لیے حکومتی قوانین اور معیاری آپریٹنگ طریقہ کار کو نافذ کرنے کیلئے کوشاں ہے۔ والدین نوجوانوں میں ویپ کے استعمال کی حوصلہ شکنی کریں۔ترجمان نے شہریوں سے درخواست کی کہ وہ اپنے بچوں کے آن لائن شاپنگ پلیٹ فارمز کے استعمال پر کڑی نظر رکھیں ۔کسی بھی مشکوک سرگرمی کی اطلاع فوری طور پر قانون نافذ کرنے والے اداروں کو دیں۔