غزہ: اسرائیل نے غزہ میں بمباری کے دوران اپنے ہی 7 یرغمالیوں کو ہلاک کر دیا۔
غیر ملکی خبر رساں ایجنسی کے مطابق فلسطین کی مزاحمتی تنظیم حماس نے کہا ہے کہ اسرائیل نے غزہ پر بمباری کر کے اپنے ہی مزید 7 یرغمالیوں کو ہلاک کر دیا۔
حماس کے عسکری ونگ القسام بریگیڈ کے ترجمان نے اسرائیلی یرغمالیوں کی ہلاکت کی تصدیق کرتے ہوئے کہا کہ اسرائیل فوج کی بمباری کے نتیجے میں اب تک 70 سے زائد اسرائیلی یرغمالی مارے جا چکے ہیں۔
دوسری جانب غزہ پر اسرائیلی جارحیت کا سلسلہ بدستور جاری ہے اور وحشیانہ بمباری میں مزید 28 فلسطینی شہید جبکہ 100 سے زائد زخمی ہو چکے ہیں۔ رفح کے اسپتال کے قریب اسرائیلی حملے میں 11 فلسطینی شہید اور 50 سے زائد زخمی ہو گئے۔
یہ بھی پڑھیں: غزہ حملے، کولمبیا نے اسرائیل سے خریداری روک دی
فلسطین کے علاقے دیر البلاح اور جبالیہ میں اسرائیلی حملے میں 17 شہری شہید اور متعدد زخمی ہو گئے۔ اسرائیل نے خان یونس میں 3 اسرائیلی فوجیوں کی ہلاکت کی تصدیق کر دی۔
فلسطین پر جاری اسرائیلی جارحیت سے اب تک 30 ہزار سے زائد افراد شہید ہو چکے ہیں۔