سیالکوٹ۔10مارچ (اے پی پی):رمضان المبارک کے آغاز کے باعث مساجد سمیت دیگر عبادت گاہوں کی سکیورٹی سخت کرنے کے احکامات جاری کردیئے گئے ہیں جبکہ پہلے عشرہ کے پہلے جمعہ کے موقع پربھی سیکورٹی سخت بنائی جا ئے گی۔
ترجمان سیالکوٹ پولیس نے اے پی پی کو بتایا کہ تمام مساجد پر بالخصوص نمازمغرب، عشاء و تراویح کے اوقات میں پولیس کے مسلح اہلکار تعینات کرنے کا حکم دیا گیا ہے جن کی ڈی ایس پیز اور ایس پیز خود مانیٹرنگ و چیکنگ کریں گے۔ انہوں نے بتایا کہ تمام جامع مساجد کی انتظامیہ سے بھی کہا گیا ہے کہ وہ اپنے سکیورٹی گارڈز اور رضاکاروں کو الرٹ رکھیں اور شر پسند عناصر پر بھی کڑی نظر رکھی جا ئے۔انہوں نے کہا کہ رمضان کے پہلے جمعہ کے موقع پر چھوٹی بڑی مساجد اور امام بارگاہوں کے مرکزی دروازوں کے باہر قانون نافذ کرنے والے اداروں کی طرف سے کسی بھی نا خوشگوار واقعہ سے نمٹنے کیلئے سکیورٹی کے سخت انتظامات کئے جائیں گے ۔