دبئی میں 24 قیراط سونے سے تیار کردہ بالکل اصل جیسے دکھائی دینے والے نمائشی کرنسی نوٹ تیار کیے گئے ہیں جو صارفین کی توجہ کا مرکز بن رہے ہیں۔
یہ کرنسی نوٹ ایک جیولر راہول ساگر نے تیار کیے ہیں جن کا مقصد اماراتی ثقافت میں سونے سے جڑی روایت کو خراج تحسین پیش کرنا ہے۔
ہر نوٹ کے اندر 0.1 گرام سونا موجود ہے جبکہ اوپر دبئی کی عمارات کی ایک تصویر ہے اور اس کا سیریل نمبر بھی کافی منفرد ہے۔
یہ اصل کرنسی نوٹ نہیں بلکہ اسے تحفے کے طور پر خریدا جاسکتا ہے۔
راہول ساگر کے مطابق 24 قیراط کے نوٹ جدید طریقہ کار سے تیار کیے گئے ہیں جن میں 0.1 گرام سونے کی پتلی تہہ موجود ہے۔
انہوں نے بتایا کہ ان کرنسی نوٹوں کو انوکھی بنانے والی چیز اس کا طریقہ کار ہی ہے جس کی مدد سے ہم حقیقی سونے کو ایک لچکدار نوٹ کا حصہ بنانے میں کامیاب ہوگئے۔
یہ کرنسی نوٹ آن لائن بھی دستیاب ہیں اور ایک نوٹ کی قیمت 159 اماراتی درہم (12 ہزار پاکستانی روپے سے زائد) رکھی گئی ہے۔