اسلام آباد۔8مئی (اے پی پی):نائب وزیراعظم اور وزیر خارجہ سینیٹر اسحاق ڈار اور ازبکستان کے وزیر خارجہ بختیار سیدوف کے درمیان بدھ کو دفتر خارجہ میں ون آن ون ملاقات ہوئی۔ دفتر خارجہ کی جانب سے جاری بیان کے مطابق نائب وزیراعظم سینیٹر اسحاق ڈار نے بختیار سیدوف کو پاکستان آمد پر خوش آمدید کہا۔
اس موقع پر نائب وزیراعظم اور وزیر خارجہ سینیٹر اسحاق ڈار نے کہا کہ دونوں ملکوں کے درمیان مضبوط دوستانہ تعلقات ہیں۔ انہوں نے کہا کہ پاکستان ازبکستان کے ساتھ تجارت ، اقتصادی میدان سمیت مختلف شعبوں میں تعلقات کو بڑھانا چاہتا ہے۔ ازبکستان کے وزیر خارجہ بختیار سیدوف نے اس موقع پر گفتگو کرتے ہوئے کہا کہ پاکستان آکر بہت خوشی ہوئی ہے، پاکستان ہمارے لئے اپنے دوسرے گھر کی مانند ہے۔ ازبک وزیر خارجہ نے کہا کہ پاکستان کے ساتھ تعلقات کو بہت اہمیت دیتے ہیں۔