پاکستان اور انگلینڈ کے درمیان ٹی 20 سیریز کا پہلا میچ آج لیڈز کے ہیڈنگلے گراؤنڈ میں کھیلا جائے گا۔
برطانیہ کے محکمہ موسمیات کی رپورٹ کے مطابق لیڈز میں آج بارش کا امکان ہے جو میچ میں رکاوٹ کا باعث بن سکتی ہے اور موسمی حالات کے باعث میچ منسوخ ہونے کا بھی خدشہ ہے۔لیڈز میں موسلادھار بارش کی وجہ سے بے ترتیب دن ہونے کا امکان ہے اور کچھ علاقوں میں طوفانی بارشیں بھی ہو سکتی ہیں جس سے دوپہر کو ٹھنڈ میں اضافہ ہوگا۔واضح رہے انگلینڈ کے وقت کے حساب سے میچ شام 6 بجکر 30 منٹ پر ہوگا اور محکمہ موسمیات کی پیشگوئی کے مطابق شام کے وقت لیڈز میں شدید بارش کا امکان ہے۔یکم جون سے شروع ہونے والے ٹی20 ورلڈ کپ 2024 سے قبل یہ دونوں ٹیموں کی آخری سیریز ہوگی۔ پاکستان اپنے تمام گروپ میچز امریکہ میں کھیلے گا جبکہ انگلینڈ اپنے راؤنڈ میچوں میں حصہ لینے کے لیے ویسٹ انڈیز کا سفر کرے گا۔پاکستان نے حال ہی میں دو ٹی 20 سیریز کھیلی ہیں جن میں نیوزی لینڈ کیخلاف ہوم سیریز اور دوسری ڈبلن میں آئیرلینڈ کے خلاف سیریز شامل ہیں۔ پاکستان اور نیوزی لینڈ کی سیریز 2-2سے برابر رہی جبکہ آئیرلینڈ کو پاکستان نے 1-2سے شکست دی تھی۔دوسری جانب انگلینڈ کی آخری ٹی ٹوئنٹی سیریز رواں سال جنوری میں ویسٹ انڈیز کے خلاف ہوئی تھی جس میں انہیں 3-2 سے شکست کا سامنا کرنا پڑا تھا۔انگلینڈ سکواڈ: جوس بٹلر (کپتان)، معین علی، جوفرا آرچر، جوناتھن بیرسٹو، ہیری بروک، سیم کرن، بین ڈکٹ، ٹام ہارٹلی، ول جیکس، کرس جارڈن، لیام لیونگسٹون، عادل راشد، فل سالٹ، ریس ٹوپلی، مارک ووڈ۔پاکستان سکواڈ: بابر اعظم، ابرار احمد، اعظم خان، فخر زمان، حارث رؤف، حسن علی، افتخار احمد، عماد وسیم، محمد عباس آفریدی، محمد عامر، محمد رضوان، عرفان خان، نسیم شاہ، صائم ایوب، سلمان آغا شاداب خان، شاہین آفریدی، عثمان خان