بیجنگ۔22مئی (اے پی پی):چین نے پاکستان کے صدر آصف علی زرداری کی جانب سے’’ون چائنا پرنسپل‘‘ (ایک چین کے اصول)پر بیان کو سراہتے ہوئے کہا ہے کہ صدر آصف علی زرداری کا بیان ایک چین کے اصول پر پاکستان کی جانب سےمضبوطی سے کاربند رہنے اور تائیوان کی آزادی کی مخالفت کا اعادہ کرتا ہے۔ چین کی وزارت خارجہ کے ترجمان وانگ وین بن نے بدھ کو معمول کی بریفنگ کے دوران کہا کہ صدر آصف علی زرداری نے حال ہی میں پاکستان کی جانب سے ایک چین کے اصول پر مضبوطی سے کاربند رہنے کا اعادہ کیا۔
چینی وزارت خارجہ کے ترجمان نے کہا کہ تائیوان کی آزادی کی مضبوط مخالفت نہ صرف چین کے منصفانہ موقف کی مضبوط حمایت کو ظاہر کرتی ہے بلکہ دنیا میں انصاف اور عدل کو برقرار رکھنے والے ممالک کی مشترکہ خواہش کی بھی بازگشت کرتی ہے، یہ پوری طرح سے ظاہر کرتی ہے کہ ایک چین کے اصول پر کاربند رہنا وقت کا رجحان اور عالمی برادری کے لوگوں کی خواہش ہے۔ انہوں نے کہا کہ چین صدر زرداری کے ان ریمارکس کو سراہتا ہے۔ انہوں نے کہا کہ چین اور پاکستان سدا بہار سٹریٹجک تعاون پر مبنی شراکت دار اور آہنی دوست ہیں۔انہوں نے مزید کہا کہ چین اور پاکستان ایک دوسرے کے بنیادی مفادات اور اہم خدشات سے متعلق مسائل پر ایک دوسرے کی مضبوط حمایت جاری رکھیں گے اور مشترکہ مستقبل پر مبنی قریبی چین پاکستان کمیونٹی کی تعمیر کے لیے مل کر کام کریں گے۔ واضح رہے کہ صدر آصف علی زرداری نے ایک انٹرویو میں واضح کیا تھا کہ پاکستان ایک چین کے اصول پر مضبوطی سے کاربند رہے گا، اس بات پر زور دیتے ہوئے کہ تائیوان چین کا ناقابلِ تقسیم حصہ ہے۔