اسلام آباد۔22مئی (اے پی پی):قائمقام چیئرمین سینیٹ سیدال خان نے کہا ہے کہ ترکیہ کے سرمایہ کار پاکستان میں موجود سرمایہ کاری کے مواقع سے فائدہ اٹھائیں، گوادر معاشی تجارتی سرگرمیوں کا حب ثابت ہوگا ،سی پیک منصوبہ نہ صرف پاکستان بلکہ خطے کے لئے بھی گیم چینجر ثابت ہوگا ۔ سینیٹ سیکرٹریٹ کے مطابق ان خیالات کا اظہار انہوں نے ترکیہ کے سفیر مہمت پاچا جی سے گفتگو کرتے ہوئے کیا جنہوں نے بدھ کو پارلیمنٹ ہائوس میں ان سے ملاقا ت کی۔ملاقات میں دوطرفہ تعلقات ، تجارت ، باہمی دلچسپی کےا مور سمیت بین الاقوامی اور خطے کی مجموعی صورتحال پر تفصیلی تبادلہ خیال کیا گیا۔
قائمقام چیئرمین سینیٹ سیدال خان نے کہا کہ پاکستان برادر اسلامی ملک ترکیہ کے ساتھ اپنے تعلقات کو قدر کی نگاہ سے دیکھتا ہے ، ترکیہ کے سرمایہ کار پاکستان میں موجود سرمایہ کاری کے مواقع سے مستفید ہوں ، گوادر معاشی تجارتی سرگرمیوں کا حب ثابت ہوگا ،سی پیک منصوبہ نہ صرف پاکستان بلکہ اس خطے کے لئے بھی گیم چینجر ثابت ہو گا ۔ انہوں نے کہا کہ ترکیہ کے سرمایہ کار تاجر پاکستان میں موجود سرمایہ کاری کے مواقع سے فائدہ اٹھائیں ۔ انہوں نے کہا کہ صوبہ بلوچستان اور خیبرپختونخوا معدنیات کی دولت سے مالا مال ہیں ، دونوں ممالک کے مابین تجارتی حجم بڑھانے کی اشد ضرورت ہے ۔انہوں نے مزید کہا کہ دونوں ممالک نے بین الاقوامی فورمز پر ہمیشہ ایک دوسرے کے موقف کی حمایت کی ہے ، برادر ملک ترکیہ کے ساتھ تعلقات کو باہمی مفادات ، تجارت ، سرمایہ کاری و دیگر شعبوں میں فروغ دے کر مزید مستحکم کیا جا سکتا ہے ۔قائمقام چیئرمین سینیٹ سیدال خان نے کہا کہ وزیراعظم شہباز شریف برادر ملک ترکیہ کے ساتھ اقتصادی و تجارتی تعلقات کے فروغ کے خواہاں ہیں۔ انہوں نے کہا کہ دونوں ممالک کے سرمایہ کاروں اور تاجروں سمیت وفود کے تبادلوں کے حوالے سے وزیراعظم سے بات کروں گا۔ قائمقام چیئرمین سینیٹ نے کہا کہ ترکیہ کے سرمایہ کار اور تاجر گوادر سمیت معدنیات کے شعبے میں سرمایہ کاری کے لئے پاکستان کا دورہ کریں، پاکستان کے سرمایہ کار اور تاجر بھی برادر ملک ترکیہ کا دورہ کر کے مختلف شعبوں میں موجود سرمایہ کاری سے مستفید ہوں گے ۔انہوں نے کہا کہ عالم اسلام کو اتحاد وحدت کی اشد ضرورت ہے ، امست مسلمہ کا اتحاد یکجہتی اور باہمی تعاون وقت کی اہم ضرورت ہے ۔ قائمقام چیئرمین سینیٹ نے مزید کہا کہ صدر طیب اردوان نہ صرف اپنے ملک بلکہ تمام مسلم ممالک کی بہتری اور خوشحالی کے لئے کوشاں رہتے ہیں ۔ انہوں نے کہا کہ دنیا بھر میں بڑھتی دہشت گردی ، شرپسندی اور دیگر مسائل کے حل کے لئے مشترکہ لائحہ عمل کی ضرورت ہے ۔ ترکیہ کے سفیر نے پارلیمانی تبادلوں کو بڑھانے اور دونوں ممالک کے درمیان عوام سے عوام کے رابطے کو مضبوط بنانے کے عزم کا اظہار کیا ۔ترکیہ کے سفیر نے کہا کہ برادر ملک پاکستان کے ساتھ تاریخی ، مذہبی اور دیرینہ تعلقات ہیں ۔ پاک ترک برادر تعلقات مشترکہ عقیدے ، ثقافت اور تاریخ کی مضبوط بنیادوں پر قائم ہیں۔ انہوں نے کہا کہ پاکستان اور ترکیہ کے مابین برادرانہ تعلقات ہمیشہ قائم رہیں گے ، پاکستان ، ترکیہ کے مابین مضبوط اقتصادی شراکت داری سے تعلقات مزید مستحکم ہوں گے ۔ گوادر ، معدنیات ، آئی ٹی ، انفراسٹرکچر اور دفاعی شعبے میں موجود سرمایہ کاری کے مواقع سے فائدہ اٹھایا جائے گا۔ دونوں ممالک کے مابین تجارت اور سرمایہ کاری کے فروغ سے تعلقات مزید مستحکم ہوں گے ۔ملاقات میں سابق ممبر صوبائی اسمبلی صدر پاکستان مسلم لیگ (ن) شیخ اعجاز احمد بھی موجود تھے ۔