جاپان نے انڈر 18 ہاکی ایشیا کپ کے فائنل میں پاکستان کو شکست دے کر ٹائٹل اپنے نام کر لیا ہے۔
چین میں جاری ایونٹ میں جاپان نے پاکستان کو صفر کے مقابلے میں تین گول سے شکست دے کر فائنل میں کامیابی حاصل کی۔
فائنل کے دوسرے، تیسرے اور چوتھے کوارٹر میں جاپان نے پاکستان کے خلاف ایک ایک گول سکور کیا جبکہ پاکستان کی ٹیم کوئی بھی گول سکور نہ کر سکی۔
اس سے قبل جمعے کو چین کے شہر ڈازھو میں کھیلے گئے ایونٹ کے سیمی فائنل میں ناقابل شکست پاکستان نے ملائشیا کو پنالٹی شوٹ آؤٹ پر تین کے مقابلے میں چار گول سے شکست دی تھی۔
اس سے قبل سیمی فائنل میں پاکستان اور ملائیشیا تین تین گول سے برابر رہے تھے۔
ملائشیا نے دو اور پاکستان نے ایک پنالٹی شوٹ ضائع کیں۔
یاد رہے کہ بدھ کو چین کے شہر ڈازھو کے نیشنل ہاکی ٹریننگ سینٹر میں کھیلے گئے میچ میں پاکستان نے میزبان ٹیم کو شکست دے کر سیمی فائنل کے لیے کوالیفائی کیا تھا۔