وفاقی دارالحکومت میں زمینوں پر قبضے کے بڑھتے ہوئے واقعات کی روک تھام اور ذمہ داروں کے تعین کے لیے حکومت نے اعلیٰ سطح کی کمیٹی بنا دی ہے اور اس سلسلے میں باقاعدہ نوٹیفیکیشن بھی جاری کر دیا گیا ہےجس کے مطابق کمیٹی کی سربراہی ڈپٹی کمشنر اسلام آباد کریں گے۔
کمیٹی کو ہدایت کی گئی ہے کہ وہ زمینوں پر قبضے کے معاملات کی جامع تحقیقات کرے اور سات دن کے اندر ابتدائی رپورٹ پیش کرے۔ رپورٹ میں قبضوں کے ذمہ داران کی نشاندہی، سہولت کاروں کے کردار اور آئندہ اس عمل کی روک تھام کے لیے سفارشات بھی شامل ہوں گی۔
ذرائع کے مطابق کمیٹی کو یہ بھی کہا گیا ہے کہ وہ صرف حالیہ شکایات تک محدود نہ رہے بلکہ سابقہ ریکارڈ کا بھی جائزہ لے تاکہ زمینوں پر قبضے کے تمام پہلوؤں کو بے نقاب کیا جا سکے۔