پاکستان ٹیلی کمیونیکیشن کمپنی لمیٹڈ نے خبردار کیا ہے کہ سمندری کیبل کی مرمت کے باعث ملک بھر میں انٹرنیٹ سروس عارضی طور پر متاثر ہو سکتی ہے۔
پی ٹی سی ایل کے ترجمان کے مطابق بین الاقوامی کیبل کنسورشیم نے ایک رپیٹر کی مرمت کا شیڈول جاری کیا ہے جس کے تحت کام 14 اکتوبر کی صبح 11 بجے شروع ہوگا اور تقریباً 18 گھنٹے تک جاری رہنے کا امکان ہے۔
ترجمان نے کہا کہ اس دوران صارفین کو انٹرنیٹ سروس میں سست روی یا جزوی تعطل کا سامنا ہو سکتا ہے۔ تاہم کمپنی نے اس بات کی یقین دہانی کرائی ہے کہ متبادل نیٹ ورک ذرائع کے استعمال سے سروس متاثر ہونے کے امکانات کو کم سے کم رکھا جائے گا۔
پی ٹی سی ایل نے صارفین سے درخواست کی ہے کہ وہ مرمتی عمل کے دوران ممکنہ سروس میں سست روی کے لیے پیشگی طور پر تیار رہیں۔ کمپنی نے مزید کہا کہ جیسے ہی مرمتی کام مکمل ہوگا انٹرنیٹ سروس معمول کے مطابق بحال کر دی جائے گی۔