ملک میں سونا ایک بار پھر ریکارڈ سطح پر پہنچ گیا ہے، جب کہ قیمتوں میں زبردست اضافہ دیکھنے میں آیا ہے۔ آل پاکستان جیمز اینڈ جیولرز ایسوسی ایشن کے مطابق فی تولہ سونا 6 ہزار 900 روپے مہنگا ہو کر 4 لاکھ 35 ہزار 100 روپے تک جا پہنچا، جو ملکی تاریخ کی سب سے بلند قیمت قرار دی جا رہی ہے۔
اسی طرح 10 گرام سونا بھی 5 ہزار 916 روپے کے اضافے سے 3 لاکھ 73 ہزار 28 روپے کا ہو گیا ہے۔ عالمی مارکیٹ میں بھی سونا تیزی سے اوپر گیا ہے، جہاں فی اونس قیمت میں 69 ڈالر کے اضافے کے بعد ریٹ 4 ہزار 140 ڈالر کی نئی حد عبور کر گیا۔
ماہرین کے مطابق، بین الاقوامی سطح پر بڑھتی غیر یقینی صورتحال اور ڈالر کی قدر میں اتار چڑھاؤ اس اچانک اضافے کی بڑی وجوہات ہیں۔