حکومتِ پنجاب نے عوامی صحت اور حلال گوشت کی فراہمی کو یقینی بنانے کے لیے صوبے بھر میں پہلے سے ذبح شدہ مرغی کے گوشت کی فروخت پر پابندی لگا دی ہے۔
محکمہ لائیو اسٹاک کے مطابق یہ اقدام بیمار یا حرام مرغیوں کے گوشت کی ممکنہ فروخت روکنے اور غیر معیاری گوشت کے کاروبار کے خاتمے کے لیے کیا گیا ہے۔
نئے ضوابط کے تحت تمام مرغی فروشوں کو پابند کیا گیا ہے کہ وہ گاہک کے سامنے ہی تندرست، زندہ مرغی ذبح کریں تاکہ گوشت کی تازگی، صفائی اور حلال طریقہ کار کی مکمل ضمانت دی جا سکے۔
حکومتی ہدایت میں شہریوں سے بھی اپیل کی گئی ہے کہ وہ پہلے سے ذبح شدہ مرغی خریدنے سے گریز کریں اور صرف ان دکانداروں سے گوشت خریدیں جو ذبح کا عمل ان کے سامنے انجام دیتے ہیں۔
محکمہ لائیو اسٹاک کے ترجمان کے مطابق یہ فیصلہ عوام کو صحت مند، محفوظ اور شرعی اصولوں کے مطابق گوشت فراہم کرنے کی حکومتی پالیسی کا حصہ ہے۔
ترجمان نے واضح کیا کہ خلاف ورزی کرنے والے دکانداروں کے خلاف سخت قانونی کارروائی کی جائے گی۔انتظامیہ نے تمام اضلاع میں انسپکشن ٹیمیں تشکیل دے دی ہیں جو مارکیٹوں میں روزانہ کی بنیاد پر چیکنگ کریں گی اور ہدایات کی خلاف ورزی پر فوری جرمانے اور کارروائی عمل میں لائی جائے گی۔