شکارپور میں مبینہ پولیس مقابلے میں دو شہریوں کی ہلاکت کے معاملے پر شکارپور پولیس کے 12 اہلکاروں کو برطرف کر دیا گیا ہے۔
سینئر سپرنٹنڈنٹ آف پولیس شکارپور شاہزیب چاچڑ کی جانب سے جاری نوٹیفکیشن کے مطابق برطرف کیے گئے اہلکاروں پر امجد لوہر اور مرتضیٰ جتوئی کے دوہرے قتل کیس میں سنگین بدعنوانی اور غیر پیشہ ورانہ طرزِ عمل کا الزام ثابت ہوا۔
برطرف اہلکاروں میں ایس ایچ او دائم ملک، اے ایس آئی ندیم حسین انصاری، ہیڈ کانسٹیبل محمد دایم لاشاری، جاوید احمد ملانو، جادل کوش، وکیل احمد، لیاقت علی جکھرو، شاہد حسین بھیو، عبدالغفار، خلیق داد بروہی، کامران علی سیٹھار اور سراج احمد لڈو شامل ہیں۔
ایس ایس پی شاہزیب چاچڑ نے کہا کہ اہلکاروں کے غیر پیشہ ورانہ رویے نے پولیس محکمے کی ساکھ کو نقصان پہنچایا جس پر انہیں فوری طور پر ملازمت سے برخاست کیا گیا ہے۔
نوٹیفکیشن کے مطابق تمام برطرف اہلکاروں کو 30 دن کے اندر اپیل دائر کرنے کا حق حاصل ہے۔