انسدادِ دہشتگردی عدالت راولپنڈی نے بانی پی ٹی آئی کی ہمشیرہ علیمہ خان کی مسلسل عدم پیشی پر ان کا شناختی کارڈ اور پاسپورٹ ضبط کرنے کے ساتھ ساتھ بینک اکاؤنٹس منجمد کرنے کا حکم جاری کر دیا ہے۔ یہ حکم 26 نومبر 2023 کو تھانہ صادق آباد میں درج احتجاجی مقدمے کی سماعت کے دوران جاری ہوا۔
اے ٹی سی کے جج امجد علی شاہ نے برہمی کا اظہار کرتے ہوئے ریمارکس دیے کہ ملزمہ ہر جگہ موجود ہوتی ہیں لیکن عدالت میں پیش نہیں ہوتیں ان کی حاضری ہر صورت یقینی بنائی جائے گی۔عدالت کے مطابق علیمہ خان کے ناقابلِ ضمانت وارنٹ گرفتاری چار بار جاری ہو چکے ہیں مگر اس کے باوجود وہ عدالت میں پیش نہیں ہوئیں۔
عدالتی کارروائی کے دوران علیمہ خان کی جانب سے کوئی وکیل بھی پیش نہ ہوا جبکہ مقدمے میں نامزد دیگر 10 ملزمان عدالت میں موجود تھے۔ استغاثہ کے گواہان بھی مالِ مقدمہ سمیت پیش کیے گئے۔
اے ٹی سی راولپنڈی نے مقدمے کی مزید سماعت 27 اکتوبر تک ملتوی کر دی ہے۔