دنیا کی سب سے بڑی ای کامرس کمپنی ایمازون نے اپنے کارپوریٹ شعبے میں 14 ہزار ملازمین کو فارغ کرنے کا اعلان کیا ہے۔ کمپنی کا کہنا ہے کہ یہ اقدام مصنوعی ذہانت کے بڑھتے ہوئے کردار اور تنظیمی ڈھانچے میں سادگی لانے کی حکمتِ عملی کا حصہ ہے۔
ایمازون کی انتظامیہ کے مطابق اس فیصلے کا مقصد بیوروکریسی میں کمی، غیر ضروری انتظامی سطحوں کا خاتمہ اور وسائل کو کمپنی کے اہم اور مستقبل کے منصوبوں کی جانب منتقل کرنا ہے۔
کمپنی نے کہا کہ متاثرہ ملازمین کو معاونت فراہم کی جائے گی جنہیں 90 روز کا وقت دیا جائے گا تاکہ وہ کمپنی کے اندر کسی نئی پوزیشن کے لیے درخواست دے سکیں اور انہیں بھرتی کے عمل میں ترجیح دی جائے گی۔
ایمازون کے سینئر نائب صدر بیتھ گلیٹی نے کہا کہ کمپنی آئندہ برسوں میں بھرتیوں کا عمل انتخابی بنیادوں پر جاری رکھے گی ،کچھ شعبوں میں کمی جبکہ دیگر میں نئی بھرتیاں متوقع ہیں۔
کمپنی کے مطابق کووِڈ-19 کے دوران ضرورت سے زیادہ بھرتیوں کے باعث اب ایمازون اپنے کارپوریٹ ڈھانچے کو مختصر کر رہی ہے۔ گزشتہ سال کے اختتام پر کمپنی کے ملازمین کی تعداد 15 لاکھ 60 ہزار سے زائد تھی جن میں تقریباً 3 لاکھ 50 ہزار کارپوریٹ شعبے میں شامل تھے۔
ایمازون کے سی ای او اینڈی جیسی نے کہا کہ کمپنی مستقبل میں جنریٹیو اے آئی پر زیادہ انحصار کرے گی جس سے انسانی افرادی قوت کی ضرورت میں کمی آئے گی۔ کمپنی اس سال 118 ارب ڈالر کی سرمایہ کاری کرے گی جس کا بڑا حصہ کلاؤڈ اور اے آئی انفراسٹرکچر پر خرچ کیا جائے گا۔