موبائل فون کے زیادہ استعمال کی وجہ سے کم عمر بچے بینائی کمزوری کی بیماری میوپیا میں مبتلا ہونے لگے ہیں۔
نجی ٹی وی کی رپورٹ کے مطابق بچوں میں نظر کی کمزوری کی بیماری میں اضافے کا انکشاف لاہور کے مغل آئی ٹرسٹ اسپتال کے زیر اہتمام منعقدہ سیمینار میں کیا گیا۔
سربراہ شعبہ پیڈز آپتھامولوجی پروفیسر سیما قیوم نے بتایا کہ میوپیا میں آنکھ کی ساخت تبدیل ہو جاتی ہے، بچے موبائل فونز کی اسکرین مسلسل دیکھتے ہیں، پلک بھی نہیں جھپکتے اور آنکھیں مسلتے ہیں۔
پروفیسر سیما قیوم کے مطابق کم عمر بچے دور کی نظر کی کمزوری کی بیماری میوپیا میں مبتلا ہونے لگے ہیں، کئی بچوں کو دور دیکھنے کے لیے منفی 7 سے 10 تک کی عینکیں لگ گئی ہیں۔
ان کا مزید کہنا تھا کہ 10سال تک کی عمر کے 40 فیصد بچے میوپیا میں مبتلا ہو چکے ہیں جبکہ ان میں ہر سال 14 فیصد تک اضافے کا خدشہ ہے۔