چیئرمین پیپلز پارٹی بلاول بھٹو زرداری کا کہنا ہے کہ وزیراعظم شہباز شریف نے 27 ویں آئینی ترمیم کی منظوری کے لیے پیپلز پارٹی سے حمایت مانگی ہے۔
سماجی رابطے کی ویب سائٹ ایکس پر جاری بیان میں بلاول بھٹو نے بتایا کہ وزیراعظم شہباز شریف کی قیادت میں مسلم لیگ (ن) کا وفد صدر آصف علی زرداری اور ان سے ملاقات کے لیے آیا۔ ملاقات میں وزیراعظم نے پیپلز پارٹی سے 27ویں آئینی ترمیم کی حمایت کی درخواست کی۔
بلاول بھٹو کے مطابق مجوزہ 27ویں آئینی ترمیم میں آئینی عدالت کا قیام، ایگزیکٹو مجسٹریٹس کی بحالی، ججز کے تبادلوں کا اختیار، اور آرٹیکل 243 میں ترمیم شامل ہے۔ اس کے ساتھ ساتھ این ایف سی ایوارڈ میں صوبائی حصے کے تحفظ کا خاتمہ، تعلیم اور آبادی کی منصوبہ بندی کے اختیارات کی وفاق کو واپسی، اور الیکشن کمیشن کی تقرری پر جاری ڈیڈ لاک ختم کرنے کی تجاویز بھی ترمیم کا حصہ ہیں۔
چیئرمین پیپلز پارٹی نے بتایا کہ اس حوالے سے پیپلز پارٹی کی سینٹرل ایگزیکٹو کمیٹی کا اجلاس 6 نومبر کو صدر آصف علی زرداری کی قطر سے واپسی پر طلب کیا گیا ہے جس میں پارٹی اپنی حتمی پالیسی کا فیصلہ کرے گی۔
بلاول بھٹو زرداری نے واضح کیا کہ پیپلز پارٹی مجوزہ ترمیم کا بغور جائزہ لے گی اور قومی مفاد کو مدِنظر رکھتے ہوئے فیصلہ کیا جائے گا۔