خیبرپختونخوا میں کل سے 5 نومبر تک مختلف علاقوں میں وقفے وقفے سے بارشوں اور بالائی پہاڑی علاقوں میں برفباری کا امکان ہے۔ اس حوالے سے صوبائی ڈیزاسٹر مینجمنٹ اتھارٹی نے تمام ضلعی انتظامیہ کو الرٹ جاری کر دیا ہے۔
پی ڈی ایم اے کے مطابق 4 سے 5 نومبر کے دوران دیر اپر و لوئر، چترال اپر و لوئر، سوات، کوہستان، کولائی پالس، شانگلہ، بٹگرام، مانسہرہ، ایبٹ آباد، ہری پور، بونیر، ملاکنڈ، باجوڑ اور مہمند میں گرج چمک کے ساتھ بارش اور بلند مقامات پر برفباری کا امکان ہے۔
اس دوران کوہاٹ، پشاور، چارسدہ، نوشہرہ، مردان، صوابی، خیبر، اورکزئی، کرم، ہنگو، کرک، بنوں، لکی مروت، شمالی و جنوبی وزیرستان، ٹانک اور ڈیرہ اسماعیل خان کے اضلاع میں بھی بارش متوقع ہے۔
پی ڈی ایم اے نے خبردار کیا ہے کہ بارشوں کے باعث ایبٹ آباد، بٹگرام، چترال، دیر، کوہستان، شانگلہ، سوات، تورغر اور شمالی وزیرستان سمیت پہاڑی علاقوں میں لینڈ سلائیڈنگ اور سڑکوں کی بندش کا خدشہ ہے۔ کمزور مکانات، بجلی کے کھمبوں، اشتہاری بورڈز اور سولر پینلز کو بھی نقصان پہنچ سکتا ہے۔
تمام ضلعی انتظامیہ کو نکاسی آب کے نظام کی صفائی، احتیاطی اقدامات، مقامی آبادی، سیاحوں اور مسافروں کو بروقت آگاہی فراہم کرنے کی ہدایت کی گئی ہے۔ کاشتکاروں اور مویشی پال حضرات کو فصلوں اور جانوروں کو محفوظ مقامات پر منتقل کرنے کا مشورہ دیا گیا ہے۔
پی ڈی ایم اے نے متعلقہ اداروں کو ہدایت کی ہے کہ ایمرجنسی سروسز، طبی امداد، خوراک اور دیگر ضروری اشیاء کی فراہمی یقینی بنائی جائے، جبکہ عوام کو خراب موسم کے دوران غیر ضروری سفر سے گریز کرنے کی اپیل کی گئی ہے۔
اتھارٹی کے مطابق ایمرجنسی آپریشن سینٹر مکمل طور پر فعال ہے اور شہری کسی بھی ہنگامی صورتحال میں پی ڈی ایم اے کی ہیلپ لائن 1700 پر رابطہ کر سکتے ہیں۔