حکومت نے قومی بچت اسکیموں پر شرح منافع میں ردوبدل کر دیا ہے۔۔ریگولر انکم سرٹیفکیٹ پر منافع 10.68 فیصد سے بڑھا کر 10.92 فیصد کردیا گیا ہے جبکہ اسپیشل سیونگز سرٹیفکیٹ کی شرح منافع 10.40 فیصد سے بڑھا کر 10.60 فیصد مقرر کی گئی ہے۔
وزارتِ خزانہ کے نوٹیفکیشن کے مطابق شارٹ ٹرم سیونگز سرٹیفکیٹ کے تین ماہ کے منافع کو بڑھا کر 10.44 فیصد اور ایک سالہ مدت کے منافع کو 10.64 فیصد کردیا گیا ہے۔
تاہم بہبود سیونگز سرٹیفکیٹ، پینشنرز بینیفٹ اکاؤنٹ اور شہدا فیملی ویلفیئر اکاؤنٹ کی شرحِ منافع میں کمی کی گئی ہے جو اب 12.72 فیصد سالانہ ہوگی۔ ڈیفنس سیونگز سرٹیفکیٹ پر بھی منافع میں کمی کی گئی ہے۔
سروا اسلامی ٹرم اکاؤنٹس پر تین اور پانچ سالہ مدت کے لیے منافع میں اضافہ کر دیا گیا ہے جو بالترتیب 10.30 اور 10.56 فیصد سالانہ مقرر کیا گیا ہے، جبکہ سروا اسلامی سیونگز اکاؤنٹس اور سیونگز اکاؤنٹس پر منافع کی موجودہ شرح 9.50 فیصد برقرار رکھی گئی ہے۔ وزارتِ خزانہ کے مطابق نئی شرح منافع کا اطلاق 4 نومبر سے ہو چکا ہے۔